بمناسبة الفلانتين.. سألنا مرتبطين ومتجوزين هل نفسك ترجع سينجل؟

عيد الحب بيكون يوم مميز في العالم، وفي مصر تحديدا ولكن الناس السنجل بياخدوه في طريق الميمز والسف على المرتبطين وإن قد إيه الحياة بتكون وردية مع الناس المرتبطين سواء صحوبية أو خطوبة أو جواز.. ولذلك قررنا نعمل استطلاع رأي بسيط مع ناس مرتبطين ونسألهم هل انتوا مبسوطين في حياتكم ولا نفسكم ترجعوا سنجل؟ والأهم لماذا في الحالتين؟

أحمد أبو المجد (27 سنة) – متزوج

مبسوط في جوازي بس معرفش ليه! لإن السؤال عن الجواز عامل زي الحب، ممكن يقول 100 سبب عن ليه بيحب شخصا ما وممكن يقول من غير سبب، فالجواز كده خصوصا لو عن حب فبيكون له أسباب كتير زي الراحة النفسية ومسؤولية جميلة والأمان والاستقرار والاحترام وتحقيق الذات والحب، وأي حد يقولك مش مبسوط في الجواز كداب لإن اللي بيجرب حاجة حلوة حتى لو للحظات عمره ما هيرجع للي قبل كده، زي ما تقول وحشتني أيام الدراسة بس أنت مش هترجعلها، فاللي جرب الجواز والحب عمره ما يرجع للي فات والجواز أهم حاجة خصوصا قبل سن الـ30.

ج.ه (28 سنة) – متجوزة

مبسوطة والحمدلله بس ساعات بحس إني عايز أخنق جوزي ومش طايقة اشوف وشه بس ساعات ببقى حاسة إني أكتر واحدة محظوظة في العالم إني اتجوزته وساعات ببقى عايزة ارجع سينجل عشان ابقى من غير مسؤوليات وابقى حُرة بعمل اللي أنا عايزاه من غير ما حد يقولي إيه وليه.

س.ط (29 سنة) – متجوزة

بالنسبة لي أول سنة كانت جحيم لأننا ماكناش فاهمين بعض في كل حاجة وبعدين بدأنا نعرف إزاي نتعامل مع بعض، والدنيا أصلا فيها هم وتعب والبني آدم بيبقى محتاج شريك يتخطى معاه تعب الحياة ويستمد الطاقة منه، ساعات بنرازي في بعض بس الجواز مرونة يعني مرة هو يعدي ومرة أنا أعدي على حسب مين عنده طاقة أكتر وقتها وبرضه الموضوع بيرجع لتقدير الموقف، وأي جواز ناجح يببقى نتيجة تعب الشريكين ولو فشت بتبقى بردو بسبب الأتنين وأحيانا ممكن تبقى من طرف فيهم ونتيجة تراكمات.

حازم فايد (27 سنة) – مرتبط

الواحد محتاج شريك في حياته والأهم إنه مايكنش مزيف لإن المزيفين كتير الفترة دي وميكونش عامله ضغط في حياته، شريكتي مش عملالي ضغط وبتحس بيا في الأوقات المختلفة، وفماحبش ابقى سنجل.