٧ حاجات هـ يفهمها بس اللى اتربى فى الخليج

18/08/2018

١. ما عشناش نفس الطفولة:

وحياة أمى ماعرف مين ماكجايفر ده! ولا شفته، ولا سمعت عنه غير من كتر كلامكوا عليه.

اللى هو من نوعية:

 -يااااااه، معقولة ماشفتش ماكجايفر؟

 -لا يا عم ماشفتهوش، انت بقى شفت نيلز؟

-إيه نيلز ده؟

- نيلز! يا عم ده كان كارتون جامد جدا! ولد صغير كده بيركب على بجعة وبيطير و ...

-بجعة ويطير؟ يا عم بقولك ماكجايفر، ده كان بيعمل كونبيلا من أستك جزمة ...

-لأ. أقنعتنى الحقيقة.

٢. ما بنعملش عمرة كل ١٠ دقايق (مخصصة للى كانوا فى السعودية).

مش شرط إنى رايح السعودية يبقى رايح أعمل عمرة، على فكرة السعودية فيها مدن كتير غير مكة، ومش لازم كل مرة تشوفنى يجى لك زهايمر وترجع تسألنى نفس السؤال.. مش لازم تسألنى أصلا! لإنى عارف إنه مهما قلت لك إنى رايح أجدد الإقامة، برضه مش هـ تقتنع!

٣. طاش ما طاش بيضحك فشخ:

طب والله جامد جدا وبيضحك كمان، بس أنت يا سيدى ماعشتش هناك، فمش هـ تقدر تفهم نوع الكوميديا دى علشان المسلسل بيناقش قضايا مجتمعية خاصة بيهم.


٤. بنعرف نقلد كل اللهجات

طبيعى.. واحد متربى وسط سوريين، ولبنانيين، وفلسطينيين، وهنود، وباكستانيين.. طبيعى لازم يعرف يتكلم بكل اللهجات دى، وبكل سهولة كمان!


٥. انت منين؟

لازم نتسأل السؤال ده كل شوية.. أول ما بتتطلع مننا كلمة بلهجة تانية بالغلط.

مثلا:

-بس بقى، لما روحت .. رحت مسوى العشا.

-مسوى العشا!؟ انت منين؟

-يا عم من مصر، بس كنت عايش برا.

-برا؟ برا فين؟

-السعودية

-آآآآآه، علشان كده! (قال يعنى لو كنت قلت انى فى زيمبابواى هـ تفرق)

٦. هناك الأكل أحسن بكتير.

مهما قعدنا نحور على بعض، ونعيش الدور، ونقول يا عم مفيش أحسن من الأكل المصرى.. لأ فيه، أبسط حاجة.. الخليج، عندك تشكيلة أكل من كذا ثقافة، خليجى تلاقى، لبنانى موجود، سورى حاضر، هندى أوى أوى، أفغانى أصلى، تركى متين، يمنى فشيخ، والمصرى طبعا.. ده غير الحلويات والمطاعم التيك أواى اللى عمرنا ما سمعنا عنها.

٧. فرق أسعار الموبايل بين هنا وهناك ١٠٠ أو ٢٠٠ جنيه بالكتير

جو ابن عمك اللى ينزلك من ليبيا بالمروحة والتلفزيون والريسيفار ده خلاص انتهى. فرق الأسعار بين مصر والبلاد التانية مش بالدرجة اللى انت متخيلها. لو عربية ماشى، لكن مش هـ توصينى أجيب لك موبايل من هناك علشان انت مكسل تنزل تجيبه. وطبعا لو جيبتهولك وطلع بايظ (لإنى مش هـ افتحه) فـهلبسه، على إيه بقى؟

Comments: