دليل ذا جلوكال لمعرض الكتاب

01/02/2017

خلاص معرض الكتاب بدأ أهو، وبدأت كريزة البيبلومانيا بتاعة كل سنة (الببلومانيا هو متلازمة شراء الكتب بشكل مرضى)، والناس بـ  تنزل المعرض كأنها رايحة كارفور عايزه تشترى كمية كتب رهيبة. ما تفتكرش إننا هـ نقولك ما تعملش كده وإقرا الكتب اللى عندك وبتاع. أبسوتلى. إحنا جايين نقول لك الأماكن اللى بـ تبيع كتب رخيصة فى المعرض علشان نساعدك تشترى كتب زى ما أنت عايز.


المركز القومى للترجمة

المكان: صالة ٢

المركز القومى للترجمة زى ما يبان من إسمه بـ يبقى فيه مجموعة كبيرة وممتازة من الكتب المترجمة من كل المجالات اللى تتخيلها. وكل مرة بـ يبقى فيه تحف فعلا ما ينفعش تفوتها. فى ٢٠١٦ مثلا كان منزل ترجمة كاملة للإلياذة لو مهتم بالأدب. ومليان روايات مترجمة لفيتزجيرالد ونيروده وكل اللى قلبك يحبه.

نصيحة ذا جلوكال: المركز بـ يديلك ٥٠% خصم لو أنت طالب ومعاك كارنيه كلية. لو أنت مش طالب شوف حد صاحبك طالب وروح معاه هـ ينفعك.

هيئة قصور الثقافة

المكان: صالة ٢

دائما برضه بـ تنزل فى معرض الكتاب بحاجات تقيلة. مرة تاريخ الجبرتى كامل، مرة موسوعة الأندلس، ومن سنة كده كان عندها الأعمال الكاملة لأمل دنقل وفؤاد حداد. ما تفوتهاش لأن أسعارها دائما رخيصة.

نصيحة ذا جلوكال: روح بدرى، ما تستناش للأيام الأخيرة علشان الحاجة هناك بـ تتاكل أكل. فعلشان تلحق أى حاجة روح أول يومين تلاتة من المعرض.

جناح المكتبة الأمريكية

المكان: جنب دار الشروق

كل سنة بـ يبقى فيه خصومات كبيرة على إصدارات السنين اللى فاتت. مكان مناسب لشراء القواميس والمراجع وأدلة السفر وغيرها.

نصيحة ذا جلوكال: دور جوا على ركن الكتب المخفضة. لو بـ تحب السفر هـ تلاقى كتب عليها تخفيض دليل سفر لونلى بلانيت وغيرهم.

مكتبة الأسرة

المكان: قدام صالة ٢

مكتبة الأسرة طبعا عارفينها من أيام القراءة للجميع. كتب رخيصة جدا وفنفس الوقت السنين الأخيرة اللجنة اللى بتختار الكتب للطبع اتطورت جدا وبقت اختياراتها حلوة أوى، ودايما هـ تلاقى كتب كويسة عندهم.

نصيحة ذا جلوكال: زى قصور الثقافة، روح بدرى علشان تلحق لأن الكتب بـ تخلص بسرعة.

مكتبة مصر

المكان: جنب مكتبة الأسرة

أكتر مكان هـ تلاقى فيه روايات للكتاب القدام بقى زى يوسف إدريس ونبيل راغب ونجيب محفوظ وعبد الحميد جودة السحار وغيرهم. ده غير إن كتب مكتبة الأسرة نوستالجيك كده وعليها الأغلفة القديمة الملونة دى اللى كنا بـ نجيبها وإحنا صغيرين.

نصيحة ذا جلوكال: هـ تلاقى من روايات كتيرة نسخ صغيرة للجيب. بـ يبقى سعرها أرخص كمان من العادية.

دار الهلال

المكان: سرايا ٥

قديمة ومعروفة ومليانة كتب من عيون الأدب العربى وبـ ينزلوا كتب عالمية بأسعار رخيصة. عدى عليها واتفرج.

نصيحة ذا جلوكال: سرايا ٥ فيها كمان جناح الأهرام والأخبار قلب فيهم هـ تلاقى حاجات لطيفة ورخيصة.

ألف وديوان

المكان: بـ يتغير كل سنة

مكتبات ألف وديوان فى حد ذاتهم حاجتهم مش فى الرخيص، بس نصيحة ذا جلوكال تابع صفحتهم على الفيسبوك أوقات كتيرة بـ يعملوا خصومات ممتازة. وكمان هم مكان ممتاز للكتب اللى عايزها ومش لاقيها فى الأماكن التانية فيه احتمال كويس تلاقيها عندهم.

سور الأزبكية

المكان: خش من الممر اللى جنب مكتبة الأسرة هـ تلاقى بداية السور

مكتبات سور الأزبكية سوق كبير للكتب القديمة والمستعملة والجديدة والمضروبة. نصيحتنا روح يوم كده من بدرى واقضيه هناك. دور بقى ونقب واصطاد لأن الموضوع ملهوش قواعد. ممكن تقفش درر بأسعار رخيصة جدا، وممكن ما تبقاش لاقى حاجة تستاهل. بس خد وقتك ودور كويس هـ تلاقى على الأقل نسخ قديمة من كتب مكتبة الشروق وغيرها بأسعار أرخص كتير.

نصيحة ذا جلوكال: الكتب والمراجع العلمية بالذات لو أنت طالب أو باحث هـ تلاقى منها كتير أوى فى السور. دور وفاصل فى الأسعار.

نصيحة أخيرة: خد معاك شنطة ضهر وإزازة مياه وأكل. الأكل هناك وحش وغالى.

Comments: