إزاي تعمل باسوورد سهل تفتكرها وصعب تتسرق؟

09/06/2019

الباسوورد جزء مهم من حياتنا، كلنا عندنا أكاونتات على أكتر من موقع، "فيس بوك"، "تويتر"، "إنستجرام"، سناب شات، ده غير الإيميل المشكلة إننا دايما بننسى الباسوورد، فبنضطر نعمل حاجات سهلة علشان ما ننساش، في نفس الوقت إنك تعمل باسوورد سهلة زي نمرة تليفون أو اسم بيخليها ممكن تتسرق بسهولة كبيرة جدا، تعالى نقولك تحل المشكلة دي إزاي؟

يعني إيه باسوورد آمنة أصلا؟

الباسوورد الآمنة لازم يبقى فيها الحاجات دي على الأقل:

  • تكون 8 حروف على الأقل
  • ما تكونش كلمة ليها معنى
  • يبقى فيها على الأقل حرف Capital
  • على الأقل واحد special character
  • على الأقل رقمين

يعني حاجة زي كده مثلا: [email protected]^

طب ما الباسووردات دي معقدة وصعب أوي تتحفظ؟ إزاي أعمل باسوورد معقدة كده وفنفس الوقت ما أنساهاش؟ خاصة إن كمان من القواعد المهمة علشان باسوورداتك ما تتسرقش إنك تعمل باسوورد مختلفة لكل أكاونت؟

عندك 3 أدوات ممكن تستخدمها علشان تتعامل مع المشكلة دي. استخدم واحدة بس أو استخدم كذا واحدة مع بعض لأمان أكتر.

١-اعمل Password Card

فيه حاجة اسمها كارت باسوورد، شكله زي الصورة اللي فوق دي، عبارة عن رموز وأرقام متنوعة في صفوف والصفوف دي متلونة، الكارت ده هتطبعه وتغلفه كده وتحتفظ بيه معاك، دلوقتي كل اللي إنت محتاجة لأي أكاونت بس إنك تحفظ لون ورمز، وتبقى الباسوورد بتاعتك هي سلسلة الحروف والأرقام اللي بتبدأ من الرمز ده، من السطر اللي فيه اللون ده.

كل اللي محتاجة تطبع الصفحة دي. وفيه رقم معقد مكتوب بخط صغير تحت خالص في الكارد كده، اكتبه على ورقة وشيله عندك في مكان أمان علشان لو الكارت ضاع منك لأي سبب، تروح للموقع وتحط فيه الرقم بتاعك يعمل لك كارت تاني بكل سهولة.

دلوقتي بقى عندك دايما باسوورد معقدة، ومش محتاج تفتكرها الكارت دايما معاك، وحتى لو اتسرق أو ضاع، اللي هـ يلاقيه مش هـ يفهم أي حاجة.

٢- استخدم Password manager

لو عايزين نمشي على أعلى قواعد أمان وتبقى الباسووردات صعبة، وكمان مختلفة لكل أكاونت، هيبقى الموضوع صعب ومعقد ومطلوب تحفظ حاجات كتير وأصلا حاجات صعبة جدا، بدل كل ده ممكن تستخدم password manager. وده بـ يبقى برنامج بـ يحفظ باسوورداتك كلها، والدخول على البرنامج نفسه بـMaster password. فأنت كل اللي محتاجة تحفظ باسوورد واحدة صعبة بس وبعد كده اعمل باسووردات معقدة على كيفك والبرنامج هـ يحتفظ بيها مش محتاج تحفظها. أشهر برامج بتعمل ده هي Last Pass و Dashlane.

طيب الـ Master password دي تعملها إزاي أصلا؟

فيه استراتيجيات متعددة لصناعة باسوورد معقدة وسهل تحفظها، طريقتي المفضلة هي طريقة الجملة، يعني إنك تختار جملة معينة وتاخد أول حرف من كل كلمة، زي مثلا: I love to go to the mall with my friends

تبقى: il2g2tmwmf وعشان تصعبها أكتر خلي أول وآخر حرف كابيتال وزود رمزين: Il2gthmwmF@#

بقى معاك باسوورد معقدة وسهل تفتكرها.

٣- اعمل استراتيجية باسووردات

فيه طريقة حلوة علشان تقدر تعمل باسووردات معقدة وصعب تتسرق، وفي نفس الوقت تكون مختلفة لكل أكاونت، وكمان سهل تفتكرها. امشي على الخطوات دي:

1- اعمل base password صعبة تتوافر فيها القواعد (لسه شارحين فوق إزاي تعمل باسوورد Master)

2- زود suffix حسب الويب سايت

يعني تعالى نتخيل إننا هنستخدم الباسوورد اللي عملناها فوق: [email protected]# تبقى الـbase ونخلي الـsuffix هو رمز& وأول وآخر حرف في اسم الويب سايت. مثلا facebook هـ يبقى &fk.. ساعتها باسوورد الفيسبوك هـ تبقى: [email protected]#&fk وAmazon هـ تبقى الباسوورد: [email protected]#&an

وهكذا.

بكده بقى عندك باسوورد مختلفة ومعقدة لكل موقع، وسهل جدا تفتكرها!

وفيه طريقة تانية ممكن تستغلها برضه وهي SuperGen Pass. وده موقع بطريقة تقنية معقدة مش هـ دخل في تفاصيلها بتديله الـMaster Password بتاعتك واسم الموقع اللي عايز تسجل عليه يعمل لك باسوورد معقدة جدا تستخدمها. ميزته إنه بيطلع باسوورد صعبة فعلا ومعقدة.

مفيش حاجة أحسن من حاجة. كل طريقة ليها مميزات وعيوب. مش مهم تختار أي طريقة، المهم إنك تختار حاجة وتستخدمها ويبقى عندك باسووردات قوية علشان تبقى في الأمان.

Comments: