١٠ ألعاب جماعية ممكن تلعبها مع صحابك قبل نهاية الأجازة

06/06/2019

الوسيلة الأساسية للاستمتاع بالوقت في العيد هي التجمعات واللمة سواء مع العيلة أو الصحاب، وبما إن أكتر من نص الأجازة الطويلة خلص وفاضل 3 أيام بس على الرجوع للشغل والالتزامات، دي قايمة بـ 5 ألعاب جماعية ممكن تلعبهم مع صحابك أو قرايبك، بعيدا عن الألعاب الإلكترونية والبلاي ستيشن.

1- أفلام

اختاروا أفلام صعبة تتمثل، أفلام الستينات والسبعينات زي "عليش في الجيش" و" للفقيد الرحمة" و"عيب يا لولو يا لولو عيب" و"تجيبها كده تجيبها كده.. هي كده".

2- الكوتشينة

الكوتشينة ليها لعب كتير ممكن تلعبها بيها زي "الكومي" و"الشايب" و "شلح" و"استميشن" و"أشك" و"واحد وتلاتين " و "طرنيب".

3- أنا عمري في حياتي ما عملت

وهي عبارة عن إن الكل يرفع إيده الاتنين ويقول "أنا عمري في حياتي ما كلت سوشي" مثلا، وكل اللي عمل كده ينزل صباعة واللي ماعملش كده يسيب صباعه، والشخص اللي هينزل صوابع إيده الاتنين هيخسر واللي هيفضل مطلع أكبر عدد صوابع هو الفايز.

4- غمزة

قطعوا ورق صغير بالتساوي على قد عددكم وارسموا في ورقة واحدة بس عين وباقي الورق فيه عدد اللي بيلعبوا، واللي بيطلع له الورقة اللي فيها عين بيغمز لحد من غير ما الباقي ياخد باله، ولو حد خد باله بيخسر الشخص اللي معاه ورقة الغمزة.

5- الصراحة

العبوا بإزازة لعبة الصراحة و أسألوا بعض سؤال واحد بس، عشان محدش يسأل التاني "هي اللعبة مش سؤال واحد بس ولا إيه؟"

6- أتوبيس كومبليت

أتوبيس كومبليت أو زي ما عرفنا مؤخرا اسمها Stop it's complete ، كل اللي هتحتاجوه ورق وأقلام وتختاروا حرف وقسموا الورق "اسم ولد، اسم بنت، حيوان، جماد، نبات، أكلة، بلد" واللي هيخلص الأول بيقول أتوبيس كومبليت والكل يسيب الأقلام.. اللي بيكتب اسم وحد تاني بيطلع كاتبه كل واحد منهم بياخد 5 نقط بس، أما لو حد كاتب اسم مختلف بياخد عليه 10 نقط، وكل واحد بيحسب لنفسه، وأكتر عدد نقط هو الفائز.

7- السلم والتعبان وليدو

السلم والتعبان وليدو غالبا بيكونوا في نفس اللوحة بس بتقلبها، السلم والتعبان بتعتمد على رمي الزهر، بترمي الزهر وبيجيلك رقم ممكن يبقى السلم ويطلعك لفوق وممكن يبقى التعبان وينزلك لتحت.

أما ليدو هي لعبة بتتلعب بـ 4 أفراد، كل شخص بيختار جزء معين من الـ 4 أجزاء: الأحمر، الأصفر، الأخضر، الأزرق، الفايز هو اللي بيحرك كل قطعة في اللوحة مرة واحدة، وبيوصل للسهم في نص اللوحة.

8- بنك الحظ:

ممكن تبدأ اللعبة في أول الإجازة وهتخلص في آخرها..حاول تحرك عربيتك على أكبر عدد من البلاد و تجمع مبلغ كبير من الفلوس عشان تشتري جراجات وبلاد أكتر، بنك الحظ ممكن تتلعب بشخصين لحد 6 أشخاص.

9- لعبة jenga:

لعبة بتتكون من 54 قطعة خشب وممكن يلعبها أكتر من شخص، فكرتها هي إنك تحط كل قطع الخشب فوق بعض لحد ما يكون مبنى، وكل واحد بيسحب قطعة خشب بالدور بس بشرط أن المبني مايقعش، والخسران هو اللي بيوقع المبنى.

10- أونو (Uno)

كل شخص بياخد 7 كروت، و الباقي من الكروت بيتحط في النص، ولازم كل لاعب يرمي ورقة نفس لون الورقة اللي قبلها أو نفس رقمها، ولو معهوش بيسحب ورقة من الورق اللي في النص، ولازم الشخص اللي هيرمي أخر ورقة يقول كلمة أونو قبل ما يرميها ولو نسي يسحب ورقتين كمان، واللي بيخلص ورقة قبل التاني هو الفايز.

Comments: