اعرف القصة الكاملة لاختراق حسابات فيس بوك

28/09/2018

حوالي 50 مليون شخص حوالين العالم اتفاجئوا الصبح بخروج حساباتهم من فيس بوك وماسنجر، واحتاجوا يعيدوا إدخال الإيميل والباسوورد عشان يستخدموا "فيس بوك" تاني ودي حاجة ماحصلتش قبل كده، مفيش حد كان فاهم إيه اللي بيحصل، لحد ما طلع مارك زوكربيج ومسؤولين عن أمن "فيس بوك"، وقالوا إيه الموضوع، وإحنا هنلخصه في السطور الجاية:


- "فيسبوك" اكتشف مشكلة أمنية إمبارح، بسببها قرر إنه يجبر 90 مليون مستخدم على الخروج من حساباتهم. 

- المشكلة الأمنية سببها عملية اختراق من هاكرز استغلوا خاصية View as، ومنها قدروا يوصلوا لرموز دخول الحسابات، الرموز دي بتمكن القراصنة ببساطة إنهم يخترقوا الحسابات، والرموز دي برضه هي اللي بتخلي حسابات المستخدمين متصلة أو logged in طول الوقت.

- "فيس بوك" فتح تحقيق موسع والمسؤولين قالوا إنهم مش متأكدين إذا كان الاختراق ده أدى لسرقة بيانات أو معلومات أو أدى لإساءة استخدام الحسابات اللي أجبرها "فيس بوك" على الخروج فيما بعد، وإنهم هيبلغوا المستخدمين بالنتايج بعد انتهاء التحقيق

- الموقع أكد إنه لسه مش عارف مين اللي ورا الهجمة الإلكترونية دي.

- خاصية View As دي بتسمح للناس يشوفوا إزاي صفحتهم بتظهر عند الآخرين 

- "فيس بوك" حاليا بيغير الرموز اللي قدر الهاكرز يوصلوا ليها، وهي رموز الحسابات اللي تمت مهاجمتها

- الرموز دي اتغيرت للـ 50 مليون مستخدم اللي اتعرضوا للهاكينج، ولـ 40 مليون مستخدم تانيين كخطوة تأمينية، ودي الحسابات اللي طلب فيس بوك إنها تعيد الدخول بالباسورد واليوز نيم مرة تانية.

- "فيس بوك" بعت لـ 90 مليون أكونت اللي خرجوا، إشارة على الـ News Feed بتحكي فيها اللي حصل، وبتقولهم إن مفيش داعي لتغيير الباسورد، لأن الموقع بيغير الرموز نفسها اللي بتخلي الحسابات متصلة، وإنهم حريصين على أمن الحسابات وهيقولوا نتايج التحقيق في أسرع وقت.

Comments: