صور: أروش موبايلات طلعت في أول الألفينات

20/06/2019

كل يوم والتاني بيظهر موبايلات جديدة وتطورات في السمارت فون والأي فون وبيبقى سعرهم خرافي والناس بتشتريهم برضو عشان التطور التكنولوجي كل من دماغهم وحياتهم حته خلاص، التطور والتقدم التكنولوجي سبب ظهور كل يوم والتاني "أبلكيشنز" أو تطبيقات جديدة بتخلق في الموبايلات ميزات متطورة أكتر، بس للأسف التركيز بقى على ميزات معينة وفيه ميزات تانيه اتنست كانت موجودة في موبايلات زمان زي نوكيا 3310 و 3300 زي:

1- زمان كان فيه خاصية معينة وهي تأليف النغمات، ماكنش فيه التطور بتاع غنت بتختار أغنية وتحطها "رينج تون" على طول كده، إنت كان لازم تجتهد وتألف النغمة اللي إنت عايزها، وده عن طريق إن كل زرار بيبقى بيطلع صوت معين، وبتبدأ تجمعهم بقى وتألف اللحن اللي إنت عايزه في الآخر.

2- شحن الموبايل دلوقتي لو كمل معاك اليوم من غير الـ "باور بانك" في النص أو تأخد الشاحن معاك يبقى أكيد إنت قافل "داتا" أو "واي فاي" ومقلل الـ "برايتنيس" ومحافظ على الموبايل أكتر من شبابك، بس زمان شحن الموبايلات النوكيا كان بيقعد بالـ 3 أو الـ 4 أيام.

3- الـ "فايبريشين" بتاع الموبايلات النوكيا القديمة كان بيخليها تقع من على الطرابيزة وينزل سالم غانم في حفظ الله وأي وقعة بقي كان بينزل سليم، لكن دلوقتي لو الأي فون اتخبط بالمخدة فيه ناس كتير أوي بتزعل على الشاشة حتى لو حاطط "سكرين" و"كوفر" وملبسه لبس نينجا.

4- نغمة المنبه كانت نغمة موحدة على القاهرة الكبرى وضواحيها، وممكن تسمعها من أي حتة ومش هتعمل Snooze وتكمل نوم عادي.

موبايلات نوكيا كملت معانا بعدها فترة بعد جيل الـ 3310 و 3300 وظهر أسامي تانية ليهم زي الدمعة والبنانا والباندا وميوزيك إكسبريس:

1- البنانا: اتسمي كده لإنه كان معووج زي الموزة وكان بيتفتح ويتقفل بغطا كده أول ما تشده لتحت يفتح المكالمة ولما تزقة لفوق يقفل المكالمة.

2- الباندا: 6600 اتشهر باسم الباندا وده لأن لون الـ "كوفر" بيكون أبيض في أسود وكان طفرة عشان شاشته الملونة وقتها، الموبايل ده ظهر في 2003

3- نوكيا الدمعة: اسمه الأساسي 7610 واتشهر بأسم الدمعة لأنه شكله شبه نقطة المياة، نزل في 2004 واتشهر لان الكاميرا بتاعته كانت 1 ميجا بيكسل وممكن تصور بيه فيديو 10 دقايق والميموري بتاعته كانت 8 ميجا بايت.

4- بيبي دمعة:اسمه الأساسي نوكيا 7620، واتسمي بـ "بيبي الدمعة" عشان هو شبه نوكيا الدمعة لكن بحجم أصغر

5- قاهر الدمعة: نوكيا 6670 نزل برضو في 2004 واتسمي كده عشان حجمه أكبر من الدمعة من حيث الشاشة، حجم الشاشة كان 2.1 بوصة، والكاميرا بتاعته كانت 1 ميجا بيكسل ، وممكن تشغل مقاطع صوت عشان تبان روش برضوِ

Comments: