لو ناوي تستقل عن أهلك.. خلي بالك من الحاجات دي

07/02/2019

كتب - رحاب سعدي 

الاستقلال .. أغلب الشباب بتفكر إنها تستقل بحياتها خصوصًا ما بين سن العشرين للتلاتينات، وفعلًا فيه ناس قدرت تاخد القرار ده وتنفذه.
 فيه ناس كتير خدت القرار ده وهما مضطرين يعني بحكم الدراسة أو الشغل، لكن فيه فئة تانية من الناس بتفكر تستقل بمزاجها حبًا في الموضوع، أو هتبعد عن مشاكل البيت. 

- أيًا كان سببك في الاستقلال فالنتيجة واحدة هو إنك قررت تتحمل مسؤولية حياتك وتعيش لوحدك، وعلشان الموضوع جد مش هزار دي شوية  خطوات ونصايح تاخد بالك منها لو هتستقل.

- أول حاجة لازم تسأل نفسه.. بتعرف تنام في البيت لوحدك ولا لأ؟ علشان لو مش بتعرف تنام لوحدك، هيختلف قرارك من إنك تأجر شقة أو تشترك مع صاحب ليك في تأجير الشقة وتعيشوا مع بعض.


-علشان تستقل لازم تبقى عارف إنك هتتحمل مسؤولية حياتك كاملة فلو إنت من الناس اللى مبتحبش تحمل المسؤولية وشايفها حاجة كبيرة عليها يبقى قرار الاستقلال مش هيكون مناسب ليك.

- لازم تكون عارف إنك هتكون مسؤول عن كل حاجة دفع الفواتير تنضيف الشقة تصليح أي حاجة بايظة أو مكسورة ده لإنك بديهي عايش لوحدك مفيش حد معاك يعملك حاجة أو تعتمد على حد زي ما كنت عايش في البيت.

- حاول تسافر أو تقضي يومين بره البيت قبل ما تاخد قرار الاستقلال علشان تتأكد إذا كنت هتعرف تعيش لوحدك، علشان تاخد قرارك وانت متأكد

- لازم تكون قادر على البعد عن أهلك من الناحية العاطفية، لإننا بنكون مرتبطين بيهم جدًا وبنحس بده لما يسافوا أو نبعد عنهم شوية، فحاول تدرب نفسك بشكل تدريجي إنك تعرف تعيش بعيد عنهم.

- موضوع الأكل مش ضروري تكون بتعرف تعمل أكل، علشان في الغالب هتعتمد على أكل المطاعم، طبعًا الأحسن إنك تحاول تجهز أكلك بنفسك وتشتري أكل وتعرف طرق تحضيره من النت عادي!

- لازم تبقى مظبط نفسك ماديًا قبل ما تستقل، يعني تظبط مصاريفك وتعرف هتقسم مرتبك إزاي، وكمان علشان تختار المكان الأنسب ليك من حيث الايجار.

- حط في خطتك المادية جزء لدفع الفواتير الكهربا والماية والغاز وفاتورة التليفون لو هتشترك في الإنترنت، وكمان لو عندك عربية تكون عارف تكاليفها ده غير مصاريف الأكل بتاعتك، كل ده هيفيدك ترتب دنيتك.

- أغلب الناس المستقلة بترتاح جدا في موضوع الاستقلال ده، خصوصًا لو فيه مشاكل أو بطبيعة الحال اختلافات في وجهات النظر بينهم وبين أهلهم، لكن ده ميمنعش إنك لو خادت الريسك لازم تبقى عارف إن الموضوع جد ومسؤولية عليك.

- كمان من مميزات الاستقلال إنها بتعلمك تعتمد على نفسك وتشيل مسؤولية حياتك وفيه ناس بتعتبرها فترة تدريب ليهم لتحمل المسؤولية  قبل الجواز، ده غير إنه بيدي مساحة أكبر للناس تعرف نفسها بطبيعة الحياة اللي بتخليهم يقعدوا أكبر وقت ممكن مع نفسهم. 

Comments: