10 ترشيحات لكتب وروايات تشتريها من معرض الكتاب
بما إن الإجازة قربت وفي الأوقات اللي زي دي رغبتنا في تطوير الذات وبدأ هوايات جديدة بتكون فوق ..عشان كده عملنالك ترشيحات كتب هتخليك تستمتع بالقراءة ولو الكتب دي مش عندك استغل فرصة فترة معرض الكتاب وأنزل اشتريهم وماتكسلش..
–كتاب حول العالم في 200 يوم:
الكتاب ده لعاشقي المغامرات ومحبي أدب الرحلات من كتابة الكاتب الكبير”أنيس منصور” بيحكي فيه عن مغامراته مع دول كتير راحها واللي لفت نظره لكل دولة من عادات وتقاليد وأساطير عنها بطريقة مشوقة هتخليك تحس إنك معاه في رحلته وبشكل عام أعمال أنيس منصور متنوعة ومميزة..
– رواية “لن أعيش في جلباب أبي”
لمحبي و عشاق المسلسل تقدروا تقروا الرواية الأصلية وتعرفوا تفاصيلها الحقيقية للكاتب العظيم”إحسان عبد القدوس” وتعرفوا ايه اللي اتغير والحاجات اللي ماتقالتش في المسلسل..
– كتاب”حادثة شرف”
الكاتب الكبير “يوسف إدريس” أهتم بالواقعية فلو أنت من محبيها هتحب مجموعته القصصية “حادثة شرف” اللي اتحولت منها القصة بعد كده لفيلم وبتتكلم عن موضوع مهم يخص المرأة والوصم اللي ممكن تتعرض ليه من المجتمع..
– رواية “مزرعة الحيوان”
للكاتب “جورج أورويل” وهو كاتب إنجليزي كبير اشتهر برواياته اللي تعتبر من أهم روايات الأدب السياسي لأنه بيقدر يعبر عن الواقع السياسي اللي عاش فيه زمان بذكاء من خلال إسقاطات كتير زي أنه حول عالم الحيوان في روايته لعالم يمثل العالم السياسي والإجتماعي اللي عاش فيه..
– صنايعية مصر
لكل اللي بيحبوا التاريخ ونفسهم يعرفوا معلومات أكتر عن مصر ..الكتاب من كتابة “عمر طاهر” المعروف بطريقته في كتابة العامية المختلفة اللي بتخلينا عايشين جوه الحدث وبيتكلم عن أهم الناس اللي ساعدت في تطور الصناعات المصرية في العصر الحديث ولكن ماخدوش الشهرة الكافية فالكاتب بيعرفنا عليهم وبصورهم وقصصهم
– أرض البرتقان الحزين
و هو ” مجموعة قصصية للكاتب الفلسطيني الكبير “غسان كنفاني” بيوصف فيها حال فلسطين والمعاناة اللي بيحملها معاه من خلال قصصه المختلفة ..
– أفكار ضد الرصاص
للكاتب والصحفي الكبير الراحل “محمود عوض” ويعتبر واحد من أهم وأشهر مؤلفاته.. الكتاب بيتكلم عن 4 كتب لـ4 كتاب مختلفين.. كل كاتب منهم تم اضطهاده ومحاربته من السلطة والمجتمع بسبب تأليفه للكتاب.. وكل كتاب منهم ناقش قضايا مختلفة كانت بتشغل الرأي العام والوسط الثقافي في نهايات القرن الـ19 وبدايات القرن الـ20.. والكتب هي “تحرير المرأة” لقاسم أمين و”طبائع الإستبداد ومصارع الاستعباد” لعبد الرحمن الكواكبي و”الإسلام وأصول الحكم” لعلي عبد الرازق وكتاب “في الشعر الجاهلي” للدكتور طه حسين
– مصر من تاني
واحد من أشهر وأهم مؤلفات الصحفي والكاتب “محمود السعدني” رائد الكتابة الساخرة في الصحافة العربية، والكتاب بيحكي عن تاريخ مصر عبر كل العصور برأي محايد ومعلومات جديدة
من النافذة
رواية للكاتب الكبير “إبراهيم المازني” بيحكي فيه عن البطل اللي بيشوف بنت جميلة في الشباك وبيتابعها ويعرف عن حياتها اكتر وكل تغير بتمر بيه ومن خلالها بيتأمل الحياة أكتر..
الشحاذ
رواية للكاتب العظيم “نجيب محفوظ “ومن خلال الشخصية الرئيسية في الرواية بيحاول يبحث عن مفهوم الحقيقة المطلقة.. وبيحس بأنه مريض بمرض ليس له علاج والتشخيص لا يبين أي مرض عضوي و حاسس بس بالفتور وعدم الرغبة في العمل أو في شىء آخر لحد ما يعرف في النهاية السر الحقيقي ورا تعبه..
