لو هترجع للإكس.. خد بالك من الحاجات دي

06/01/2019

كتب- رحاب سعدي 

قرار الرجوع للأكس بيكون صعب، لأن الناس بيكون عندها الخوف من إن المشاكل تتكرر تاني أو تفشل في نفس العلاقة لمرتين.
لو قررت أنت والشخص اللي كنت مرتبط بيه إنكم ترجعوا تفكروا في علاقتكم تاني، في شوية حاجات لازم تاخد بالك منها قبل ما الخطوة دي.

في مقال منشور بمجلة "cosmopolitan" مجلة نسائية أمريكية، عنوانه إزاي ترجع للإكس بتاعك أكدت المقالة على نقط مهمة لازم يراعيها أي شخص قرر إنه يرجع للحبيب السابق، أولها خطوة لازم تقوم بيها لو لسه مش واخد القرار وهي إنك ترتب حياتك، يعني تقضي وقت مع أصدقائك وتمارس نشاطات وهوايات بتحبها وتجدد دايرة علاقتك، كل ده هيساعدك في إنك تقرر ترجع للإكس ولا تتراجع عن القرار ده.

وفي نفس المقالة وضحت نقط مهمة للأشخاص اللي قرروا فعلًا الرجوع للحبيب السابق، أهمها متحطش خطة للتعامل معاه لإنك بمجرد ما تحس إن قرار الرجوع حاجة صح وإن مفيش حد جديد دخل حياتهم لازم تتعامل بأريحية في العلاقة من غير ضغط أو ترقب.

كمان وضحت المقالة على ضرورة إن الشخصين يرجعوا يتكلموا في الحاجات اللي كانت بتضايقهم وبتسعدهم في العلاقة، وده يبساعد إن الناس تفهم بعضها أكتر.

ومن الحاجات المهمة ضروري يكون فيه مساحة بين الشخصين للكلام وكل واحد فيهم يحس إنه واخد مساحته في العلاقة وفيه تواصل ما بيهم المهم تكون فيه خطوة تكسر حاجز الصمت ما بينهم.

الرجوع لعلاقة بعد فشلها في المرة الأولى بيكون ليها إيجابيات منها إنك تبقى عارف نقط ضعف العلاقة دي أو المشكلات اللي واجهتها في المرة الأولى فبيكون سهل عليك تتجنبها، وفيه إيجابيات تانية ذكرتها مجلة سيدتي في مقالة بعنوان سلبيات وإيجابيات العودة بعد الانفصال، من ضمن الإيجابيات دي إن الحوار ما بينهم بيكون هادي أكتر بعد الرجوع يعني بيكونوا خلاص استوعبوا مشكلاتهم وطبيعة شخصية كل واحد فيهم، كمان بتكون فيه طريقة كويسة ومفيدة للعلاقة للتعامل مع المشاكل وهو لما حد بيغلط بيعترف بغلطه علشان يقدر يحل المشكلة.


كمان من المواقع المهمة اللي كتبت عن موضوع الرجوع بعد الانفصال بين الشريكين كان موقع "ويكي هاو" واللي قدر يقدم نصايح فعالة للناس اللي حابة ترجع لعلاقة قديمة من النقط المهمة اللي اتكلم عنها هو إننا نكتشف السبب اللي خلى العلاقة دي تفشل ومتكملش علشان نقدر نتجنبها، كمان أي علاقة دخلتها وفشلت لازم تبقى عارف إن فيه جزء من المسئولية بيكون عليك في إنك أكيد اتصرفت بطريقة غلط في موقف من المواقف فلازم تكتشف عيوب شخصيتك وتحاول تحلها.

وبعد كل الكلام والنصايح اللي شوفناها في الموضوع ده، لازم تبقى متأكد إن أنت الشخص الوحيد اللي يقدر يحدد إذا كان الرجوع للحبيب القديم حاجة صح ولا غلط، وكمان إيه أحسن طريقة للتعامل بيها معاه وكل ده دي حاجات نسبية مختلفة من شخص للتاني.

Comments: