١٥ نصيحة عشان تخلص كتب في وقت أسرع

31/01/2019

لو إنت شخص بتستمتع بالقراءة عموما فغالبا هتبقى عامل لنفسك "تارجيت" كل سنة إنك تخلص عدد معين من الكتب السنة دي، أو ممكن تبقى شخص مهوس بقى بالقراءة وتعمل مسابقات مع صحابك مين اللي هيخلص كتب أكتر في السنة دي.

وأيا كان السبب أو الدافع اللي مخليك تقرأ أكتر فأنت محتاج تعرف شوية نصايح لو عرفتهم هتقرأ أسرع في وقت أقل، موقع Inc جمع مجموعة من نصائح الخبراء في القراءة عشان تقرأ أسرع وهم:

1- ماتخليش الهدف الأساسي هو القراءة الكتير:

أقرأ عشان تستمتع بالقراءة في حد ذاتها أكتر، وحدد لنفسك تارجيت معين يعني مثلا كتاب في الشهر، أو 20 صفحة في اليوم، ولما هتستمتع بالقراءة عموما هتلاقى إن التجربة ممتعة جدا وأقل مجهود، ولو كانت قرايتك مش مرهقة هتلاقي نفسك بتركز وبتقرأ أسرع.

2- حافظ على أهدافك لنفسك: فيه دراسة اتعملت في 2009 مع بعض الدكاترة النفسيين إن الأفراد اللي كانوا بيشاركوا أهدافهم مع الناس ماكنوش بيقدروا يحققوها في حين الأشخاص اللي كانوا بيشاركوا أهدافهم مع نفسهم ومع الدكتور النفسي بس كانوا بينجحوا في تحقيقها، والسبب هو إنك لما بتشارك أهدافك مع حد الحافز في إنك تنجزها بيبقى أقل.

3- متكملش الكتاب لو مش عاجبك:

كلنا ممكن نبقى في نص الكتاب ونوقف قراية ونسأل نفسنا "هو أنا بقرأ إيه؟" أو "أنا بستفاد إيه من الكتاب ده؟"، لو لقيت نفسك مش عاجبك الكتاب وقف قرايته وابدأ في قراءة كتاب تاني.

4- أقرأ الكتب اللي إنت بتستمتع بيها أكيد:

ممكن يعجبك أسم كتاب معين أو تبقى عايز تقرأ كتاب عن أزاي تكون رائد أعمال مثلا، أو ازاي تكون أب مثالي، هتلاقي نفسك مستمتع أكتر بقراية الكتب اللي عجباك أو اللي شددتك من الكتب اللي المفروض تقراها عشان تاخد منها معلومة.

5- خلى دايما معاك كتاب في إيدك:

لو خصصت وقتك للقراءة هتحس بإلزام، عشان كده من أحسن الحاجات اللي ممكن تعملها إن تخلى الكتاب معاك ولما تحس إنك فاضي ابدأ اقرأ.

6- خد وقت من الحاجات الغير مهمة وخليه للكتب:

في أوقات كتير في يومنا بتضيع في التقليب بين قنوات التلفزيون، أو التقليب على السوشيال ميديا وفيديوهات الـ Youtube اللي بتشد، أكيد بتستمتع لما بتعمل ده بس حاول تتحكم في الوقت ده وتقسمه بين إنك تستغل جزء منه في القراءة وجزء تاني للولا حاجة.

7- اشترك في تحديات للقراءة:

من مميزات التكنولوجيا موقع زي Goodreads كده بتعرف تشوف صحابك ممكن يقروا إيه، ومن خلاله كمان بتقدر تكتشف كتب جديدة.

8- اخلق جو مخصوص للقراءة خالي من التشتيت:

حاول تعمل الموبايل Silent مثلا أو Airplane mode ، أو تقعد في أوضة مافيهاش تلفزيون، خصص وقت مافيهوش أي حاجة ممكن تشتتك وأنت بتقرأ.

9- حوش فلوس للكتب:

ممكن تصرف في الشهر فلوس ملهاش لازمة مثلا على حاجات ملهاش لازمة، لو حوشت المبلغ ده حتى لو بسيط هتلاقي نفسك بعد ما تخلص الكتاب اللي بتقرا بتشتري كتاب تاني من غير أي مشاكل في الفلوس.

10- غير نظرتك للقراية:

من أهم النقط بقى عشان تقرأ بشكل أحسن إنك تبطل تبص للقراية إنها نشاط يومي بتعمله، أو حاجة المفروضة عليك، غير نظرتك ليها وبصلها كأنها حاجة زي التنفس والأكل والشرب.

11- اقراء كتب في مجالات مختلفة:

لما تقرأ مجموعة من الكتب المختلفة مش هتحس بالملل لإنك مش هتبقى بتقرأ نفس الكلام أو نفس المعلومات، ممكن الطريقة دي ناس كتير متحبهاش بس هي في المطلق بتمنع الملل يعني.

12- اتعلق بالقراءة في أوقات قبل النوم وفي السفر:

السفر تقريبا هو أحسن وقت للقراية، فيه أوقات كتير بتضيعها في الإنتظار، أو بتقعد في الهوا كده بس، الأوقات دي تقريبا بتكون أحسن أوقات للقراية، لأن بيبقى أحسن وقت تركز فيه.

13- شارك اللي بتقراه مع الناس:

خليك فاكر إنك متشاركش أهدافك للقراءة، لكن شارك اللي قريته لإن ده هيخلي الناس أصلا ترشح لك اللي قروه قبل كدة أو الكتب المشابهة اللي ممكن تعجبك.

14- خليك دايما مستعد للكتاب اللي بعد كده:

لما تكون قربت إنك تخلص الكتاب اللي معاك، اعمل خطة أو خد دقيقتين بالظبط من وقتك وحدد فيهم إيه الكتاب اللي هتحب تقراه بعد كده، لإنك لو وقفت قراءة على ما تختار الكتاب اللي بعد كده ممكن تاخد وقت طويل على ما ترجع للقراءة تاني.

15- خد ملاحظات وإنت بتقرأ، وأقرأ بصوت:

الطريقة دي ممكن تزعج بيها اللي حواليك، بس لما هتقرأ بصوت هتوصلك الرسالة اللي في الكتاب على طول ومش هتبقى محتاج تقرأ نفس السطر مرتين مثلا هتفهمه من أول مرة، وسواء كنت بتكتب الملاحظات بتاعتك أو بتقولها بصوت ده هيخليك بعد ما تقرأ الكتاب تحس إنك استفدت حاجة منه مش مجرد آلة للقراءة.

Comments: