٥ أنواع سبانخ غير سبانخ مامتك

26/03/2019

عمرنا ما شوفنا حد بيعزم حد على قلقاس أو سبانخ، الأكلتين دول عليهم إجماع إنهم مابيتحبوش، بغض النظر عن القلقاس، النهاردة 26 مارس، اليوم العالمي للسبانخ.

السبانخ خضار حلو ومفيد جدا ومليان حديد على رأي ماما، وبغض النظر عن صحة الكلام ده من عدمها، السبانخ اتظلمت معانا واتحكم عليها أبشع الأحكام من الكبار قبل الصغيرين، السبانخ واخدة اهتمام الناس سواء بالحب أو الكراهية، لدرجة إن شخصية كارتونية اسمها "باباي" ظهرت مخصوص بياكل سبانخ وبعد ما يكلها كان بيبقي قوي، وأكيد ست الحبايب حاولت في مرة تضرب لك بيه مثال عشان تاكل سبانخ زيه بس المشكلة في الطريقة اللي ماما بتطبخ بيها السبانخ، أو المشكلة الأكبر إن في مصر نوع السبانخ المتوفر هو السبانخ البلدي اللي بتجبر ماما تطبخها بالصلصة، مع إن فيه أنواع تانية لو جربتها هتحب السبانخ وتحتفل معانا بالسبانخ في يومها العالمي.

فيه 5 أصناف من  السبانخ وهما:

1- السبانخ البلدي أو القبرصي:

هو أوراقه صغيرة الحجم وملساء، وضعيفة النمو، وبيزهر بسرعة

2- السالونيكي:

هو شبه الصنف البلدي شوية لكن نموه قوي والورقة سهمية ومقسومة لقصبتين من أسفل النص،وبيزهر بدري

3- الباسيفيك:

وهو من الأصناف الجديدة وبيتميز بقوة النمو والمحصول الكتير وورق عريض

4- البروكلي:

هو صنف متأخر في التزهير، والورقة معلقية وليها جناحين ولونها أخضر داكن ومجعدة وسميكة نوعا ما.

5- فيروفلاى:

النباتات قوية النمو ومتأخرة في الأزهار.

كل أنواع السبانخ دي وماما مصممة تجيبلنا السبانخ البلدي وتطبخهالنا بالصلصة، مع إن فيه وصفات أحلى للسبانخ زي:

1- تغميسة الريكوتا والسبانخ:

المقادير:

4 أرغفة عيش بيغيل سادة

1 حزمة سبانخ ممزقة

400 جرام جبن ريكوتا طازة

1/2 كوباية جبنة بارميزان مبشورة

1/3 كوباية زيت زيتون

بصلة مبشورة

فصين ثوم مفروم

معلقتين قشطة حامضة كبار

طريقة التحضير:

1- سخن الفرن على درجة حرارة 210 وبطني الصنية بورق زبدة، اقطع العيش نصين وحطه على ورق الزبدة، وادهنه بالزبدة أو زيت وسيبه في الفرن من 7 لـ 8 دقايق

2- سخن باقي الزيت في طاسة على النار وضيف البصل والثوم وبعدين ضيف السبانخ لمدة دقيقة أو لحد ما تدبل

3- اخلط  السبانخ والريكوتا والبارميزان والقشدة الحامضة وضيف عليهم الملح والفلفل وقدمهم مع العيش.

الوصفة التانية: السبانخ بالبشاميل:

المقادير:

كيلو سبانخ طازة مقطعة

معلقتين كبار دقيق

ملعقة كبيرة سمنة

3 كوبايات لبن

كوباية مرقة دجاج

معلقة كبيرة جبنة مبشورة من أي نوع

4 كوبايات مياه

طريقة التحضير:

1- اغلي مياه في حلة وبعد ماتتغلى ضيف السبانخ للمياه قبل ما يتغير لونها ارفعها من على النار

2- اعمل بشاميل عادي وضيف عليه الجبنة المبشورة لحد ما تذوب.

3- في صينية مدهونة بالسمنة افرد السبانخ وغطيها بالبشاميل وحطها في الفرن لمدة 20 دقيقة.

الوصفة التالتة: سموثى السبانخ و الموز و الأفوكادو:

المقادير:

1 موز

1/2 أفوكادو مقشر و مقطع شرائح

 1/2 كوب سبانخ طازجة

1/2 كوب حليب

6 مكعبات ثلج

2 ملعقة شاي من العسل

1 ملعقة صغيرة فانيليا

طريقة التحضير:

اضرب  فى الخلاط  الموز و الأفوكادو والسبانخ و الحليب و مكعبات الثلج والعسل و مستخلص الفانيليا لحد ما يبقى ناعم، وبيتقدم بارد

Comments: