٥ لقطات من حفلة شيرين في دبي: شكرت محمد صلاح على الدعم

31/03/2019

بعد قرار وقفها في مصر، شيرين ظهرت لأول مرة بعد القرار ده في القرية العالمية بدبي، الحفلة اللي نظمتها شركة روتانا للصوتيات والمرئيات.
وطبعًا لإن الحفلة دي كانت أول حفلة بعد وقفها عن الغناء، كانت فيها لقطات مهمة جدًا كان لازم نقول عليها، منها:

- الجمهور طلب منها إنها تغني أغنية "جرح تاني" فردت "حاضر" وكملت "ده جرح تالت"، إشارة منها لعدد المرات اللي اتوقفت فيها من نقابة الموسيقيين، وبالمرة الأخيرة تعتبر دي المرة التالتة.

- وجود جوزها الفنان حسام حبيب طول الحفل جنبها، كانت لقطة مهمة ونالت استحسان الناس والجمهور اللي اتفرج على الحفلة أو اللي حضرها

- شيرين شكرت محمد صلاح على مكالمته الهاتفية ليها، وقالت نص المكالمة واللي كانت عبارة عن إنه بيقولها "إنت كويسة وإحنا بنحبك، خليكي جامدة"، وقالت شيرين إنها فرحت بالمكالمة جدًا وطلبت من الجمهور في الحفلة إنهم يحيوه

- غنت الفنانة شيرين أغنية "مشربتش من نيلها" رغم إن الاغنية  كانت سبب في وقف الفنانة شيرين وتوجيه تهمة "تهديد الأمن القومي المصري".

- إطلالتها في الحفلة كانت تشبه بشكل كبير إطلالتها في أول أغانيها "آة يا ليل"  واللي كانت لابسة فيه كاجول بنطلون جينز وبلوزة دانتيل.

Comments: