اعرف إزاي تبقى نينجا محترف في 13 خطوة
أفلام النينجا خدت وقت كبير من حياتنا، بدء سلاحف النينجا مرورا بالراجل بتاع أين أشيائي اللي كان في فيلم لا تراجع ولا استسلام.. لو بتعجبك شخصية النينجا ونفسك تبقى نينجا كبير قد الدنيا خلينا نقولك شوية خطوات تعملها عشان تبقى نينجا وفقا لموقع “wikihow-fun” بيديك خطوات عشان تكون صغير ونينجا!
1- النينجا عندهم قدرة عالية على التخفي، وعشان كدة لازم تتمرن على إنك تتحرك بليل، وحاول تخلي عينك تتجنب أي نور، ده بيخلي عينك تتأقلم مع الضلمة وده شيء مهم عشان تبقى نينجا.
2- تسلق الأشجار مهم عشان تبقى نينجا، وعشان مفيش حاجة تقف عائق قدامك وكمان ده هيساعدك عشان تتحرك بذكاء وفن النينجات، وكمان ده بيديك رؤية أوسع وكمان تخفي عن الأعداء واللي إحنا منعرفش هما مين الحقيقة!
3- لازم ولابد تتعلم سباحة.. إحنا في الشتاء وكدة بس النينجا مش بيفرق معاهم الكلام ده لو عايز تبقى نينجا، السباحة بتقوي الجسم وكمان لازم تتعلم إزاي تعوم في صمت عشان لو احتجت تقرب من هدف أو عدو.. ممكن لو عايزين تخطفوا الإكس!
4- التمويه شيء أساسي عشان تكون نينجا صالح للمجتمع، يعني تستخبى بين الصخور أو بين الشجر.
5-امشي بالراحة وبهدوء عشان ده أهم شيء عشان تكون نينجا وتكتم خطوات رجلك، وكمان تعرف إزاي تلهي الناس وتوجهم بشكل غلط عشان تتحرك أنت صح.. زي إنك ترمي زلطة بعيد تعمل بيها صوت!
6- والـ”جود” نينجا بيجري بسرعة ودي أحد أهم خطواتك عشان تكون نينجا أصيل، التدريب على الجري مهم عشان تعرف تهرب لو اتحطيت في كمين، كل اللي تعمله إنك هتجري 60 ثانية بالراحة وبعدين افتح سبرينت 30 ثانية وبعدها 60 ثانية بالراحة وكرر الحوار 3 مرات.. هتتعب شوية بس معلش هانت وهتبقى نينجا!
7- قوة النينجا الحقيقية بتيجي من نطته، محتاج تدرب على القفز بشكل قوي لإن ده هيساعدك إنك تتجنب هجمات العدو ولذلك محتاج تقوي رجلك جدا، يعني إبدأ نط بأعلى قدرة عندك لحد ما تحس إنك تعبت وكرر التمرين ده كتير مع إنك تنط وأنت مقرفص
8- مهم جدا تقوية القلب، فا تقدر تعمل ده باستخدام وزن جسمك، والتدريبات اللي بتشغل الجسم كله مش عضلة واحدة مفيدة للصحة، وده ممكن تلاقيله تمارين كتير
9- بكل بساطة.. اتعلم تايكندو
10- النينجا لازم يتجنب كل المخاطر وكمان يتجنب شك الأعداء فيه، إلبس هدوم تناسب البيئة اللي أنت عايش فيها أو الدولة اللي أنت عايش فيها عشان تبان إنك من أهل البلد دي
11- نظم نفسك.. يعني نظم النفس اللي بتأخده شهيق وزفير، لما هتيجي تستخبى محتاج تهدي نفسك عشان محدش يحس بيك وفي نفس الوقت وأنت بتجري متتعبش.
12- اعمل دايت قوي بإنك تقلل السكريات واللحوم والألبان، لما تكون أخف حركتك هتبقى أخف.
13- خد بالك.. أتدرب من غير ما حد يعرف، النينجا مفيش حد يعرف إنه نينجا غير هو نفسه.. السرية التااااامة.
وطالما كملت للآخر فا أنت فعلا عايز تبقى نينجا وإحنا كدة حطناك على أول الطريق.. ربنا معاك يا بطل!
