٨ فتاوى رمضانية غريبة: ريحة البخور بتفطر وفانوس رمضان حرام

16/05/2019

رمضان زي ما هو شهر الخير والإحسان هو كمان ميعاد متجدد للفتاوى الغريبة اللي بتظهر كل سنة، نسبة الفتاوى الرمضانية تقريبا 20% من مجمل الفتاوى العامة وده تبع إحصائية للمؤشر العالمي للفتاوى GFI اللي تابع لدار الإفتاء المصرية ومن أغرب الفتاوى هما:

1- أول فتوى كانت من تنظيم داعش وبتحلل الفطار لأعضاء التنظيم في المعارك، بمبرر إن الصيام بيتعب الجسم

2- الفتوى التانية لتنظيم داعش هي اللي بتمنع خروج الستات الصبح في الصيام لإنهم يعتبروا فتنة، والست اللي عايزة تخرج بعد المغرب تخرج ومعاها محرم، وإن في آخر 10 أيام في رمضان المحلات المفروض تقفل للتفرغ للعبادة

3- توقيت أذان الفجر اختلف عليه بعض الشيوخ وخصوصا في مصر، شيوخ سلفيين إن توقيت صلاة الفجر مش صح أصلا ولازم يتأخر لفترة زمنية معينة، لكن لجنة المساحة واللجنة الدينية في البرلمان أكدت اللي الشيوخ دول قالوه غلط

4- فتوى الفطار في الامتحانات، أفتت بيها مؤسسات في دول أجنبية وعربية قالوا إن يجوز للمتضررين من الصيام في الحر والمذاكرة، الفطار بس بشرط إن يكون فيه تهديد إن ممكن يسقطوا ومستواهم يبقى أقل بسبب الصيام

5- فتوى كمان لياسر برهامي قال فيها إن جوايز الدورات الرمضانية تعتبر قمار وإن البخور وريحة البخور بتفطر

6- فتوى سلفية تانية قالت إن فانوس رمضان وزينة رمضان وإمساكية رمضان حرام.

7- وفتوة داعشية رمضانية كمان إن اللي بيكره تنظيم داعش فصيامه غير مقبول، وإن اللي مابيحبش التنظيم مايكلفش نفسه مشقة الجوع والعطش.

8- آخر الفتاوى الغريبة اللي ظهرت هي فتوى الشيخ أنس السلطان بإن شطافة الحمام بتفطر في الصيام


 

Comments: