"وسط البلد للمبتدئين".. دليلك عشان تبقى من شباب "وسط ناو"

18/05/2019

وسط البلد منطقة مهمة وحيوية جدا في القاهرة، عمارات سكنية ومحلات قديمة وشوارع تجارية وأماكن للخروج وقهاوي عشان تحتوي كل طبقات الشعب اللي معاه فلوس واللي ماعهوش (طبعا إنت لو من شباب وسط البلد مش هتقول غني دي وهتقول برجوازي).

وباختصار أكتر: "شباب وسط البلد" هما المجموعة اللي بتقعد قهاوي وسط البلد، عندهم شوية تفاصيل ومصطلحات وطباع معينة كده هي اللي شاغلة ترند السوشيال ميديا بقالها يوميا، بنقدملك دليل مفصل عشان تقدر تبقى واحد منهم.

مبدئيا كده هي اسمها عند كل الناس "وسط البلد" عادي لكن عند شباب وسط البلد اسمها "وسط" أو "وسط ناو"، وده - لو تعلمون - راجع للأسئلة اللي كان بيسألها شباب "وسط" على السوشيال ميديا "مين في وسط ناو؟" عشان يتجمعوا ويقابلوا بعض.

طبعا ده مش تعميم، لأن مش كل اللي بيقعدوا في وسط البلد بينطبق عليهم الكلام ده ولا بينطبق عليهم البوست اللي قوم التريند "إنت ممكن تبقى مبسوط في أي حته لكن طالما قعدت في وسط البلد يبقى اسمها ممتن"، عشان كده لو حسيت إن التريند حمسك وسخنك تنزل وسط البلد تعالى نحكيلك:

1- في الأول تعريف المنطقة: وسط البلد بتبدأ من طلعت حرب مرورا بهدى شعراوي وباب اللوق ومحمد محمود وميدان التحرير لحد شارع القصر العيني وجاردن سيتي، وشاملة كمان الشوارع المتفرعة من 26 يوليو عند دار القضاء العالي بمطعم "آخر ساعة"، إنت كده عرفت المقرات الرئيسية.

2- محلات "الفاست فوود" كتير في وسط البلد، بس وإنت هناك لازم تاكل Low Budget، وإنت في أي مكان ممكن تاكل ساندويتش تشكين شيدر هالبينو لكن طالما قعدت في وسط البلد هتاكل ساندوتش "كريم علام"، هتلاقيه في مطعم اسمه "سامح وسط البلد" موجود في هدى شعراوي، فكرة الساندوتشات عند سامح قايمة على الميكسات الغريبة، وكل ميكس غريب اتسمى على أسم صاحبه اللي اخترعه.
 

3- قدام سامح على طول في هدى شعراوي برضه فيه محل اسمه "فسحة سمية" بيعمل أكل بيتي اليوم بيومه، وكل يوم فيه مينيو جديد، المحل بيبدأ يقدم الأكل في حدود الساعة 5 وتقريبا على الساعة 8 مابياخدش أوردرات تاني.

4- في أي مكان اسمه "الشبراوي"، لكن في وسط البلد اسمه "القزاز"، القزاز بيتميز إنه بيقدر يحتوي شباب وسط البلد لما يفلسوا وتقدر تفطر وتتغدى وتتعشى من القزاز وممكن تحلى كمان، موسم "القزاز" هو عز البرد عشان شوربة العدس بتاعته علامة مميزة، المحل موجود في 38 شارع صبري أبو علم متفرع من ميدان طلعت حرب.

5- كبدة وسجق الكحلاوي، أشهر عربية كبدة تقريبا في وسط البلد، لو مالكش في الشطة بلاش منها.

6- في أي مكان اسمها هدخل التواليت في ماكدونالدز، لكن في وسط البلد اسمها رايح "جاد"، طبعا الكلام ده مالوش أي علاقة بأكل المحل، فلو إنت في وسط البلد وعايز تاكل "كريب"، يبقى جاد باب اللوق.

7- عموما اسمها نازل "Date" بس في وسط البلد اسمها نازل اقابل ملاذي، فلو قررت تنزل Date مع بنت من بنات وسط ناو هما 4 أماكن اللي هيساعدوك، وكلهم في محمد محمود عندك "سيلنترو"، "أولدش"، "بينوس"، و"بيسكوا"، وعشان ماتتفجئش محتاجين نقولك إن الأماكن دي زحمة طول الصيف عشان مكيفة وبتحتوى شباب وسط، ده غير إن أكلها حلو بس خد بالك ده للبرجوازين بس.

8- في العموم ممكن تجيب لبسك من "زارا" أو "بول أند بير"، لكن طالما قعدت في وسط البلد لازم تلبس من "قاف جاليري" وتقعد فيه كمان، وتتصور جنب إزازة الـ "Jack Daniel's " وجملة "حتى العيوب بتحليها" وتقعد في البلكونة وتشتري شرابات وهدوم وشنط ونوت بوكس أرت في أرت، كل حاجة هناك أرت حتى المزيكا، "قارف" مكانه في 5 شارع البستان، قصر النيل، الدور السادس.

9- عايز تذاكر أو تشتغل في أي مكان هتروح Co- working space لكن في وسط البلد اسمه "جاليري"، زي "جاليري حيفا" اللي في 5 شارع طلعت حرب، المكان كبير وبيهتم بالأرت برضه والغنا وساعات بيبقى فيه حفلات صغيرة كده على الضيق.

10- ناحية شارع القصر العيني وجاردن سيتي فيه 3 أماكن "أرت" ومريحة جدا وبتحتوي شباب وسط، شقة جاردن سيتي ودي هتلاقي فيها شعرا كتير ومكانها 2 شارع اتحاد المحامين العرب القصر العيني، و"فلك" وده مكانه 7 جمال الدين أبو المحاسن القصر العيني، و"رووم" طبعا وده هتلاقي فيه حفلات برضه صغيرة كده على الضيق وبيكون فيه أوقات "كاريوكي" لو بتفكر تعمل حاجة جديدة، وموجود في 10 شارع اتحاد المحامين العرب، القصر العيني.

كده ناقصلك تتكحرت في وسط البلد شوية كمان، للسبب ده إنت محتاج تتعرف على قهاوي وسط البلد المشهورة لحد ما تقابل قهوة صغيرة محندقة تحتويك:

1- قهوة البستان، علم من أعلام وسط البلد، قهوة أرت برضه بس هتلاقي مرسوم على حيطانها ناس ناجحين زي محمد صلاح، ديكور القهوة فيه أنوار كتير ولو هتقعد على "البستان" هيبقى قريب منك القزاز وكحلاوي اللي قولنا عليهم فوق.

2- قهوة Dwaffle، القهوة بالظبط قدام وزارة الأوقاف في أول هدى شعراوي عشان كده لو هتاكل من عند "سامح" أو من "جاد" أو من "الكحلاوي" هات أكلك واقعد عليها، من مميزات القهوة إن صيف شتا جوها حلو وفيها هوا.

3- قهوة "الحرية" جنب "جاد" باب اللوق على طول، من القهاوي العريقة اللي في وسط البلد وهي قهوة وفي نفس الوقت بار شعبي.

4- قهوة "الحامدية" و"الندوة الثقافية"، قهوتين جنب بعض من القهاوي القديمة برضه، عليهم شباب وسط ناو، بس شباب وسط ناو أوي.

5- قهوة "الفلاح" و"الكراسي البيضا" في القصر العيني، قهاوي شعبي فعلا بس قاعد عليهم شباب أرت وروش جدا.

6- وطبعا فيه كذا قهوة في محمد محمود بالذات قدام السنترال، هتلاقي عليهم مصورين صحفيين كتير، أو ناس تعرفهم من على السوشيال ميديا هتتكعبل فيهم صدفة.

Comments: