١٠ أسباب للإحباط..الحرامي اللي بيسرق العمر

19/05/2019

كتبت: مرام أبو النجا

الإحباط هو رد فعل على الوقعة اللي بتقعها من سابع سما وفي لحظة تلاقي نفسك على الأرض، على كل حقيقة خبطت في وشنا وكنا بنحاول ننكرها، على كل لحظة إدراك لواقع كارهينه أو مفروض علينا، على كل حلم ضاع، وقلب اتوجع، على كل ظلم واستغلال مشاعر وطاقة وعمر.

نسبة كبيرة من الشباب بالذات في سن العشرينات محبطين، وفي اللي منهم بقاله سنين في دايرة الإحباط دي، وتقريبا مفيش شاب معداش على الدايرة دي حتى ولو كضيف خفيف، يمكن السبب في دخول دايرة الإحباط في السن ده إننا بنخبط في أسباب كتير من اللي اتقالت فوق بعد سلسلة من الأحلام الوردية وتصورات عن العالم المثالي، سألت مجموعة من أصدقائي سؤال محدد كنت بحاول من خلاله أجمع الحاجات اللي  بتحبطنا وتيجبنا أرض.

السؤال كان: إيه أكتر شيء محبط في الدنيا بالنسبالك؟ (طبعا أنا استثنيت ظروف البلد والسياسة والكلام ده عشان دي بديهيات)، وحاولت ألخص الأسباب دي في تسع نقط، والعاشرة كانت رأيي الشخصي واللي سبته للآخر

1- إن الواحد ميعرفش يحقق حلمه نتيجة لأسباب خارجة عن إرادته، في اللي شاف الأسباب داخلية، حاجة فيه هو شخصيا أومتعلقة بيه بس مش هيقدر يغيرها، وفي اللي شافها أسباب خارجية زي ظروف، أو دور إنسان تاني، شيء أكبر منه ومن قدرته على تغييره

2- في اللي شاف إن أكتر شيء محبط في العالم إن مشاعرك ماتتقدرش، أو تُستهلك ويتم استغلالها بدون مقابل أو رد من الطرف التاني، وده اللي ممكن يوصلك لإنك تخاف تحب خوفا من تكرار الإحباط ده

3- التعب في أي حاجة بدون تحقيق نتيجة في المطلق، وكأن تعبك ده بيتبخر في الهواء، أو إنك تدرك إن الواقع مختلف عن اللي إنت تخيلته فبالتالي تعبك مش هيكون ليه مكان ولا نتيجة

4- إن أكتر شخص تكون مستني منه دعم وتشجيع  في أي موقف وتكون متعلق بخيط الأمل اللي بيجيلك منه، متلاقيهوش، سواء عن قصد منه  أو حتى من غير قصد

5- الإدراك المتأخر، لكل حاجة بداية من واقع وقرارات واختيارات، لوقت ضاع مع ناس وحاجات عمرها ما كانت مناسبة، لحظة الإدراك هنا محبطة لأنك بتشوف الوقت اللي ضاع من عمرك

6- اللي مايستوعبش ولا يقدر إن ليك طاقة أو آخر، بتبقى عنده شطبت، ومتقدرش تعمل أكتر من كده

7- إن الظروف تحطك في اختيار بين حاجة بتحبها وشخص بتحبه، وتكون مجبر بالاختيار إنك تحرم نفسك من حاجة عشان التانية

8- العشم، عشان أسرع حاجة بتطلعك السما وفي لحظة تخسف بيك الأرض

9- إنك تتكلم كتير، تقول أنا هعمل وهروح وهسوي وهقلب الدنيا، ولما الوقت يمر تبص وراك تلاقي إنك معملتش حاجة غير الكلام

10- وده رأيي الشخصي، إنك متعرفش نفسك، متفهمهاش، متحبهاش، تظلمها، لأن ساعتها شعور الإحباط هيلازمك طول عمرك.

في أسباب كتير تانية للإحباط غير اللي اتقال، بس تعددت الأسباب والنتيجة واحدة، هي إن (الإحباط) هو الحرامي  اللي بيسرق من روحنا وعمرنا اللي مبنعرفش نرجعه تاني.


 

Comments: