بسبب "ترامب".. موبايلات "هواوي" هتفقد تحديثات "جوجل" وأبلكيشنز "بلاي ستور" للأبد

19/05/2019

شركة هواوي قالت يوم الحد إنها كانت حريصة إنها تظهر بشجاعة قدام الأحكام اللي هتصدرها الحكومة الأمريكية والعواقب المترتبة عليها، بعدما قرر الرئيس الأمريكي دونالد ترامب وضع الشركة في "بلاك ليست" وبالتالي ممنوع على الشركات الأمريكية التعامل معاها بما فيها شركة "جوجل"، هواوي كتبت تويت بتقول فيها "قرار إجبار الشركات الأمريكية على عدم التعامل مع شركة (هواوي) هيخلق خسارة للطرفين".

بعد كده في نفس اليوم، كتبت "رويترز" إن "جوجل" هتوقف التعامل مع "هواوي" وبالتالي هتتحرم "هواوي" من تحديثات "أندرويد" كلها والأبلكيشنز كمان، ماعدا الحاجات المفتوحة، ورئيس شركة هواوي "Ren Zhengfei" كان صرح للصحفيين يوم السبت إنهم مستعدين لده.

وطبعا متوقع إن شركة "هواوي" نموها هيقل لكن بشكل قليل، بكده "هواوي" هتفقد نظام تحديثات الأندرويد، والنسخة اللي جايه من موبايلات "هواوي" بره الصين هتفقد إمكانية الوصول للتطبيقات اللي في "Google play" وتطبيق الـ Gmail.

لكن لسه الخدمات المحددة دي بين "جوجل" و"هواوي" في طور المناقشة وده وفقا لمصدر لـ"رويترز". متحدث شركة "هواوي"يوم الجمعة قال إن لسه المحامين بيدرسوا تأثير إجراءات وزارة التجارة الأمريكية على مستقبل "هواوي" وبالنسبة لممثلي وزارة التجارة الأمريكية ماكنش عندهم تعليق وقتها.

"هواوي" هتستمر في المحاولة للوصول لنظام تشغيل في حدود المتاح لها من التراخيص المفتوحة عشان الأشخاص اللي عايزين يستخدموا موبايلاتهم، خصوصا في ظل الحملات الكبيرة اللي بتقول إن موبايلات "هواوي" مش هيبقى ليها لزمة بعد كده لأنها هتقف عند مرحلة معينة من غير تحديثات ولا تطبيقات جديدة.


 

Comments: