مينا مسعود بطل فيلم علاء الدين: كنت أتمنى اشتغل مع عادل إمام

20/05/2019

اتفرجنا زمان كتير على كارتون علاء الدين والأميرة ياسمين، بس حاليا الكارتون هيتحول لفيلم والفيلم هيكون بطولة ويل سميث وناعومي سكوت ومينا مسعود.

مينا مسعود هو ممثل كندي من أصل مصري مواليد 17 سبتمبر 1992 في القاهرة، وعاش في أونتاريو بكندا، وبعد كده اتنقل للعيشة في لوس أنجلوس في أمريكا، بدأ تمثيل سنة 2011 في فيلم What happens next، وسلسلة الكارتون The 99 ، وبعد كده اتشهر بعد المسلسل الكندي الأمريكي open heart واللي تم إنتاجه سنة 2015، وشارك كمان في فيلم Strange but True مع الممثلة الأمريكية إيمي ريان والممثل جريج كينير ونيك روبينسون، وأخيرا تم اختياره لدور علاء الدين في فيلم Aladdin اللي هتنتجة شركة ديزني وهيتعرض في 24 مايو 2019.

تم اختيار مينا مسعود من ضمن 200 مرشح للدور، وأصر المخرج "جاي ريتشي" إن الدور يبقى لشخص هندي أو مصري الجنسية عشان ملامحهم تكون ملامح عربية، والدور اللي هيقوم بيه علاء الدين فيه تمثيل ورقص وغنا.

وقال مينا مسعود في حوار بالعربي لـ BBC عربي، إنه مبسوط جدا إنه بيقدم الشخصية دي خصوصا واللي بتعتبر شخصية عامة بالنسبة للعرب والمصريين بالذات، وهو أصلا مصري في الأساس، وقال إنه مش حاسس بالخوف لإنه عارف إن الشركة عملت مجهود كبير عشان تلاقي الشخص المناسب للدور، وقال كمان إن كان عنده مدة 6 شهور يتدرب فيهم على الدور، ده غير  إنه كمل التدريب في فترة التصوير، بالذات لإن الدور صعب واستهلك منه تقريبا من 14 لـ 15 ساعة كل يوم في 6 أيام كل أسبوع.

وقال كمان إنه اتولد في مصر واتنقل لتورنتو لما كان عنده 3 سنين، وقال إن أهله كانوا عايزينه يبقى دكتور زي أخواته الاتنين اللي درسوا صيدلة، وهو فعلا دخل كلية الطب في جامعة تورنتو لكنه بعد سنة واحدة ساب الجامعة ودرس تمثيل، وقال إن ده كان سبب خلافات ومشاكل مع أهله في الأول لإنهم سابوا كل حاجة في مصر عشان يبدأوا حياة أحسن لولادهم هناك، بس بعد كده تقبلوا الأمر الواقع.

واتكلم عن ويل سميث وقال إن إنه إنسان طيب جدا ممثل شاطر جدا وموهبته فظيعة، واتعلم منه كتير ومن أهم الحاجات اللي اتعلمها منه إن الأضواء والشهرة ماتغيركش، واتكلم عن الأدوار اللي كانت بتتعرض عليه وقال إن الإدوار اللي كانت بتتعرض عليه كانت أدوار الإرهابي بسبب إنه عربي، لكن كل المشاكل اللي وقف قدامها ساعدته إنه يبقى على اللي هو فيه بعد 7 أو 8 سنين من الشغل.

وقال كمان إنه عايز يروح مصر ويظهر في أدوار مع ممثلين عرب ومصريين، خصوصا إنه كان بيتفرج على أفلام مصرية مع أهله في البيت، وقال إنه عايز يمثل مع عادل إمام اللي أثر في شخصيته وأسلوبه في التمثيل، وقال كمان إنه اتفرج على فنانين كتير زي نور الشريف وعمر الشريف وإسماعيل ياسين.

وقال عن كلامه بالعربي إنه أبوه وأمه كانوا بيتكلموا عربي في البيت مع بعض، وإنهم هيتعلموا الانجليزي أو أي لغة تانية من المدرسة واختلاطهم بالناس.

Comments: