١٠ نقط هتساعدك تقلل سعر الفاتورة بعد زيادة أسعار الكهربا

21/05/2019

وزير الكهربا والطاقة المتجددة الدكتور محمد شاكر، قال إن هيكون فيه زيادة بنسبة 14.9% في أسعار شرايح الكهربا واللي هيتم تطبيقها من أول يوليو اللي جاي.

وده جدول الأسعار الجديدة للكيلو وات، واللي تم الإعلان عنه يوم التلات 21 مايو من وزارة الكهربا في مؤتمر صحفي:

الشريحة الأولى من صفر لـ 50 كيلو وات = 30  قرش بدل 22 قرش

الشريحة الثانية من 51 لـ  100 كيلو وات = 40 قرش بدل 30 قرش

الشريحة التالتة من صفر لـ 200 كيلو وات = 50 قرش بدل 36 قرش

الشريحة الرابعة من 201 لـ 350 كيلو وات = 82 قرش بدل 70 قرش

الشريحة الخامسة من 351 لـ 650 كيلو وات = 100 قرش بدل 90 قرش

الشريحة السادسة من651 لألف كليو وات = 140  قرش بدل 135 قرش

الشريحة السابعة اللي يزيد عن ألف كيلو وات مالهمش دعم = 145 قرش

وطبعا عشان مشاكل البيت الطبيعية اللي بتواجهنا كلنا وقت استلام فاتورة الكهربا والخناقة العائلية الجميلة بتاعت مين اللي عمل كده في الفاتورة، إحنا هنقولك على شوية خطوات تعملها عشان تتجنب الخناقات الشهرية المعتادة اللي من النوع ده:

1- لو كنت عايز تشغل كومبيوتر، استخدم لاب توب بدل جهاز الـ PC وده لإن اللاب توب بيستهلك 22 وات) لكن جهاز الكمبيوتر الديسك توب بيستهلك حوالي (68 وات)

2- استخدم لمبات موفرة للطاقة أو لمبات ليد عشان بتوفر حوالى 60% من الطاقة

3- حاول تقلل من استخدام الكاتيل واستخدم براد الشاي لإن الكاتيل بيستهلك كمية كبيرة من الطاقة وبالذات لو فيه كمية مياه كتير لإنه هيسخنهم كلهم، فلو استخدمت "كاتيل" حط مياه على قد اللي هتستخدمها.

4- اعمل صيانة دورية للتكييفات في مراكز الصيانة المتخصصة عشان من غير صيانة التكييفات هتستهلك كهربا أكتر.

5- حاول تستخدم التكييف على درجة حرارة من 23 لـ 25 درجة.

6- بلاش تقفل وتفتح التلاجة كل شوية عشان الفتح والقفل بيخلوها ترجع تبرد من أول وجديد تاني

7- بلاش تحط الفرن جنب التلاجة لإن درجة حرارة الفرن هتأثر على التلاجة لو تم فتحهم هما الاتنين مع بعض وبالتالي التلاجة هترجع تبرد من أول وجديد

8- جمع أكبر كمية من الهدوم على قد حمولة الغسالة في المرة الواحدة لإن في كل مرة الغسالة هتشتغل هتستهلك كهربا

9- لو عندك سخان كهربا حاول تستبدله بسخان غاز ولو مش متاح اتأكد إن مفيش تسريب للمياه السخنة

10- وأخيرا، زي ما بابا وماما بيقولوا وإنت خارج من الأوضة، شيل فيشة الجهاز بعد ما تخلص استخدامه واطفي النور

Comments: