١٥ حقيقة مخيفة عن تلوث البلاستيك هتخليك تغير عاداتك

22/05/2019

قبل ما نتكلم عن البلاستيك ونقول حقايق عنه بص حواليك وشوف فيه كام حاجة من البلاستيك معاك، كوباية القهوة ممكن تبقى بلاستيك، الأكل اللي بتجيبه بيبقى في أطباق بلاستيك ممكن كمان "كوفر" الموبايل اللى إنت ماسكه من البلاستيك، احنا فعلا بنستخدم كميات من البلاستيك أكتر من اللي بنتخيلها، "The environmental health news" بتقول إن الكيماويات المضافة للبلاستيك الجسم البشري بيمتصها، وإنتاج البلاستيك بينتهي في الأخر إننا بنأذي نفسنا أو بنأذي البيئة والحيوانات معانا كمان.

 ودي حقايق مفروغ منها وغيرها فيه 15 حقيقة تانية ممكن تبقى أول مرة تعرفها موقع 25list قالهالنا وهما:

1- إنتاج البلاستيك بيزيد بسرعة:

الدراسات أثبتت إن إنتاج البلاستيك ارتفع من 2 طن سنة 1950 لـ 380 مليون طن في 2015، وفي 2050 تقريبا إنتاج البلاستيك هيكون 34 مليار طن.

2- ألمانيا أكتر بلد بتعمل إعادة تدوير:

ألمانيا بتعمل إعادة تدوير لـ 56% من النفايات، والنمسا وكوريا الجنوبية في المرتبة التانية بتعيد تدوير 53%، وأمريكا حتى مش في قايمة الـ 10 الأوائل دول.

3- 46% من البلاستيك بتطفو على محيطات في العالم:

تقريبا نص المحيطات فيها نفايات بلاستيك بتطفو عليها، ومين عارف قد إيه من البلاستيك ممكن يبقى غرق في أعماق المحيطات.

4- كوبايات القهوة البلاستيك بتاخد تقريبا من 30 لـ 50 سنة عشان تتحلل:

ده لإن الكوبايات البلاستيك فيها مواد غير قابلة للتجدد، عشان كده بتاخد وقت طويل عشان تتحلل، وللسبب ده فيه شركات زي Starbucks بتقدم خصم تقريبا 10% لو جبت معاك كوبايتك اللي بتعيد استخدامها تاني.

5- بيتم توفير الطاقة عن طريق إعادة التدوير:

حرق البلاستيك في محرقة بيتطلب تقريبا ضعف الطاقة اللازمة لإعادة التدوير.

6- 100 ألف كائن من الثدييات البحرية بتتقتل بسبب البلاستيك:

بسبب الكميات الصغيرة من البلاستيك اللي موجودة في البر والبحر الحيوانات المائية بتغلط وبتاكلها، وعشان كده فيه مئات الأف الثدييات المائية بتموت بسبب تلوث البلاستيك.

7- الأمريكان بيرموا حوالي 185 رطل من البلاستيك كل سنة:

وفقا لتقارير وكالة حماية البيئة الأمريكية فالأمريكان بيعيدوا تدوير ويحولوا حوالي 1.51 رطل من نفاياتهم الشخصية وده حوالي 4.40 للشخص في اليوم الواحد.

8- يومياً بيتم استخدام 500 مليون شفاطة بلاستيك:

أغلب الوجبات السريعة بيكون معاها عصير أو صودا وده بيستهلك شفاطة، وعشان كده الشفاطات هي أكتر حاجة بتلوث الشواطئ.

9- مفيش غير 4 طرق للتعامل مع النفايات البلاستيك:

ممكن يتم إعادة تدوير النفايات البلاستيك أو تحويلها لوقود أو طاقة أو إتلافها أو بتترمي في بيئات طبيعية، وطبعا الاختيار الأحسن في ده هو إعادة تدويرها أو تحويلها لوقود.

10- نص البلاستيك اللي في العالم مصنوع في أسيا:

الدول الأسيوية زي مثل الصين وإندونيسيا وتايلاند والفلبين بتشكل 60٪ من مشاكل البلاستيك في المحيطات، الصين وإندونيسيا وفيتنام بينتجو أكبر قدر من النفايات البلاستيك.

11- 40% من البلاستيك مصنوع عشان التغليف:

التغليف والتعبئة هو أكتر حاجة بيتم استخدام فيها البلاستيك وممكن نستغنى عنهم أصلا، وتاني أكبر استخدام للبلاستيك في البناء، والمركز التالت في الملابس.

12- فيه 100 مليون شنطة الأمريكان بيستخدموها يومياً:

على عكس دول كتير حظرت استخدام الشنط البلاستيك أمريكا مامنعتش، لو بطلنا استخدام الأكياس البلاستيك كل يوم ده هيقلل من استخدام النفايات البلاستيك.

13- الكيماويات في البلاستيك ممكن تخليك تتخن:

فيه مواد كيميائية زي (BPA)  و(BADGE) موجودة في البلاستيك ممكن تسبب زيادة الوزن، اه هي مش السبب الوحيد للسمنة بس بتسبب السمنة.

14- فيه أجزاء من البلاستيك في مياه الشرب بتاعتنا:

المواد البلاستيكية بتشكل قطع صغيرة جدا وبيبقى ليها القدرة على إنها تعدي من المرشحات المائية، الدراسات لقيت إن 83% من الحنفيات في المدن الكبرى في كل أنحاء العالم بينزل منها مواد بلاستيكية.

15- الشعب المرجانية بيموتوا في كل العالم:

الشعب المرجانية من أكبر الأنظمة البيئية الموجودة على الأرض لإنها بتشكل بيوت لكائنات بحرية كتير، ده غير فوايد كتير ليها زي تثبيت الكربون والنيتروجين، البكتريا اللي من البلاستيك بتسبب أمراض للشعب المرجانية.

Comments: