ملخص حكاية عنصرية ماجد المصري في شيخ الحارة والهجوم عليه

24/05/2019

من فترة مش طويلة، غالبا في بداية رمضان انتشر برنامج للفنانة شيماء سيف اسمه "شقلباظ" وهو برنامج مقالب بتعمل فيه دور سودانية، ومن بعدها هاجمها الجمهور جدا لكنها مش حادثة العنصرية الوحيدة اللي حصلت رمضان السنة دي، كمان من يومين ظهر الفنان ماجد المصري في برنامج "شيخ الحارة" واتكلم فيه بعنصرية عن موقف قديم حصل له.

الموقف كان عبارة عن سؤال من شيخ الحارة عن حكاية البنات الأفارقة، فرد ماجد المصري وقال إنه كان موقف هزار بينه وبين واحد صاحبه اسمه حمادة الدسوقي، اللي اتصل بيه وقاله إن فيه 3 بنات عايزين يتعرفوا عليه، ووافق ماجد المصري وصاحبه اتفق معاه على الساعة 2 في ميدان روكسي وهو راح في الميعاد بالظبط، فصاحبه وقف قدامه بالعربية وقاله خليك واقف هما هيفتحوا ويركبوا معاك، ونزلوا وهما مخبيين نفسهم وركبوا معاه، فلما شالوا الغطا اللي على وشهم لقى 3 أفريقيات.

وكمل ماجد المصري وقال إن اللي جيه عليه وقتها/ إنه فضل يقولهم انزلوا، انزلوا، وبالتالي رد فعل الجمهور ماكنش في صالح ماجد المصري وانتقده بالشكل ده:

وبعدها صرح الفنان ماجد المصري إن اللي قاله ده مجرد ذلة لسان مش أكتر، وإنه كان بيهزر وده على سبيل الفكاهة بس، وإنه مايقصدش أي إساءة للبنات الأفريقيات أبدا.

وكمل كلامه وقال إنه رجل أفريقي إزاي يسخر من الأفارقة واللي حصل هو غلط في التعبير غير مقصود، وللسبب ده اتقدم باعتذار لكل اللي اتضايق من كلامه في البرنامج.

Comments: