في عيد أفريقيا.. 7 حقايق غريبة عن القارة: أقصر حرب وأعلى نسبة "إيدز" في العالم

25/05/2019

يوم 25 مايو من كل سنة، هو عيد أو يوم أفريقيا زي ما أقرته الأمم المتحدة، واللي بيوافق الذكرى السنوية لتأسيس منظمة الوحدة الأفريقية في 25  مايو 1963، واللي وقعت عليه 32 دولة أفريقية مستقلة في أديس أبابا في إثيوبيا، وفي عام 2002، منظمة الوحدة الأفريقية اتغير اسمها للاتحاد الأفريقي، وكجزء من الاحتفال بيوم أفريقيا، جمعنا حقايق غريبة عن تاني أكبر قارة في العالم، نشرها موقع Answer Africa و Signature Safaris.

1- أقصر حرب في العالم 

أفريقيا كانت شاهدة على أقصر حرب في العالم مدتها 38 دقيقة بس، وقامت بين الجيش الإنجليزي من ناحية وجيش زنجبار من ناحية تانية، في 27 أغسطس سنة 1896، وقامت الحرب بعد وفاة السلطان حمد بن ثويني البوسعيدي اللي كان تابع للبريطانيين، واستيلاء ابن عمه خالد بن برجش على الحكم، بريطانيا اعتبرت الاستيلاء على الحكم من غير مشورتها تمرد، وبدأ الجيش البريطاني يهاجم القصر الملكي، وبعد 38 دقيقة بس، رفع خالد بن برجش الرايات البيضا واستسلم وانتهت الحرب.

2- تاني أشرس حرب في العالم

زي ما كانت أفريقيا موطن أقصر حرب في العالم، هي برضه الأرض اللي شهدت تاني أشرس صراع في العالم والحرب الأكتر قتلا للبشر بعد الحرب العالمية التانية، وهي حرب الكونغو اللي استمرت من 1998 لـ 2006، ومات فيها أكتر من 5 مليون شخص، وقامت الحرب بعد توترات بين رواندا وزائير (جمهورية الكونغو الديمقراطية بعد كده)، الحرب تطورت وشملت 7 دول أفريقية، ورغم انتهاء الحرب بشكل رسمي، لكن بعض المناوشات لسه بتحصل لحد دلوقتي بعد 21 سنة من الحرب.
 

3- واحدة من أقدم جامعات العالم

رغم الارتفاع الكبير في نسبة الجهل والأمية، لكن أفريقيا كانت موطن لواحدة من أقدم جامعات العالم، وهي جامعة تيمبوكتو في مالي، واللي اتبنت في القرن الـ 12، وعموما مدينة "تيمبوكتو" اتسمت فيما بعد بـ"باريس العصور الوسطى"

4- أكبر نوع ضفادع في العالم

في غينيا والكاميرون، بيعيش أضخم نوع ضفادع في العالم، واللي طوله بيوصل 33 سنتيمتر، ووزنها أكبر من وزن طفل بشري حديث الولادة

5- أكبر عدد مرضى "إيدز"

في جنوب أفريقيا، أكبر نسبة مصابين بمرض نقص المناعة "إيدز"، هما حوالي 5.6 مليون شخص بنسبة 9% من إجمالي السكان، ونسبة 17% من إجمالي البالغين (من 15 - 49 سنة)

6- المسافة بين أفريقيا وأوروبا

رغم الاختلاف الكبير في الثقافات والعادات والتقاليد والمستوى الاقتصادي والاجتماعي، والفرق في القوة الصناعية والتجارية بين أفريقيا وأوروبا، إلا إن 9 أميال بس هي المسافة الفاصلة بين القارتين، من خلال مضيق جبل طارق اللي بيربط بين إسبانيا والمغرب

7- السمك بيحمي من الأرواح الشريرة

في تونس، الناس بيعتقدوا إن السمك بيحمي من الشياطين والأرواح الشريرة، عشان كده رسومات وصور السمك موجودة في كل البيوت التونسية تقريبا، وبعض المنازل بيحطوا في أساساتها عضم سمك أو ديل سمكة، السمك في تونس رمز للخير وحماية من العين والشرور

8- أكبر درجة حرارة في العالم

بعض الإحصائيات، سجلت مدينة "العزيزية" في ليبيا كأكبر درجة حرارة في العالم بـ 58 درجة مئوية، إحصائيات تانية سجلت Death Valley في كاليفورنيا كأحر منطقة في العالم بـ 56 درجة، لكن العزيزية هتفضل واحدة من أحر المدن في العالم

Comments: