تفاصيل استحواذ منصة Watch iT على الحقوق الحصرية لمحتوى ماسبيرو

25/05/2019

الشركة المتحدة للخدمات الإعلامية اللي بيرأسها تامر مرسي، والمالكة لمجموعة إعلام المصريين، ومجموعة "دي ميديا" عملت بروتوكول مع الهيئة الوطنية للإعلام المسؤولة عن إدارة "ماسبيرو"، عشان تاخد الحقوق الحصرية لمحتوى "ماسبيرو" للعرض على تطبيق Watch IT.

اتفاقية الاستحواذ هتمشي على المحتوى القديم اللي أنتجه التلفزيون المصري وبيتعرض على قنواته أو على المحتوى الجديد اللي لسه هيتم إنتاجه، وده شامل مكتبة ضخمة جدا من البرامج والأغاني المسلسلات وماتشات الكورة القديمة، الاتفاقية كمان هتشمل النشرات الإخبارية اللي بتتذاع الساعة 6 والساعة 9.

تامر مرسي، رئيس مجلس إدارة الشركة المتحدة قال إن الاتفاقية هدفها الحفاظ على محتوى وتراث التلفزيون وحماية حقوق الملكية الفكرية من خلال منصة رقمية حديثة بتستخدم التقنيات الجديدة في العرض الحصري، وبالتالي حماية المحتوى من الانتهاك.

قبل استحواذ Watch iT، كان محتوى التلفزيون المصري بيتم عرضه على "يوتيوب" مجانا، مع عائد إعلاني كان بيحصل عليه "ماسبيرو" من "جوجل"، أما دلوقتي فالمحتوى هيتشال من على "يوتيوب".

Comments: