ملخص حكاية استقالة "بسمة وهبة" من "القاهرة والناس":  عنصرية وتشهير وخوض في أعراض

26/05/2019

قدمت الإعلامية بسمة وهبة برنامج "شيخ الحارة" على قناة "القاهرة والناس" للموسم التالت على التوالي السنة دي، وكعادة البرنامج بيبقى فيه أسئلة محرجة للضيف عن حياته العملية والشخصية، بسمة استضافت كذا نجم السنة دي وردوا على بعض زي مثلا أحمد سعد وسمية الخشاب، والسنة اللي فاتت استضافت ريم البارودي واتكلمت معاها عن أحمد سعد.

وللأسف حلقة سمية الخشاب وردها على أحمد سعد ماكنتش أسخن حلقات الموسم ده، حلقة ياسمين الخطيب هي اللي عملت الضجة الأكبر وبسببها حصل مشاكل كتير لبرنامج "شيخ الحارة" وبسمة وهبة نفسها، وده بسبب سؤال بسمة وهبة عن علاقة ياسمين الخطيب بالمخرج خالد يوسف، وقالت ياسمين إنهم اتجوزوا فترة فعلا برغم نفي خالد يوسف إنهم اتجوزوا.

وصرحت ياسمين الخطيب في اللقاء وقالت "جوازي من خالد يوسف لعنة بتطاردني، ومابتشرفش بالفترة دي"، وقالت كمان إنها مش خطافة رجالة وإنها ماكنتش على علم إنه متجوز في الفترة اللي اتجوزها فيها، وكانت عارفة إنه انفصل عن زوجته، وكان بيسافر كل فترة فرنسا بحجة إنه بيزور بنته من مراته اللي موجودة هناك، وأضافت كمان إنها أعلنت جوازها وكتبت على صفحتها الشخصية على الفيسبوك ما يدل على إنها انفصلت، وكان معروف انفصلت عن مين، وإن مش هي اللي سربت الصورة المسربة ليهم لإن إيه اللي ناقصها عشان تدعى إنها اتجوزت واحد علاقتهم انتهت من سنتين؟

خالد يوسف قرر إنه يرفع دعوة قضائية على القناة والبرنامج ومقدمة البرنامج بسبب التعمد في الخوض في سيرته وعرضه والتشهير بيه، وبعدها أكد طارق سعدة، نقيب الإعلاميين إن مجلس النقابة خد قرار إنه يوقف المذيعة بسمة وهبة، وده بسبب التجاوزات المهنية اللي بتخالف ميثاق الشرف الإعلامي ومدونة السلوك المهني اللي حصلت في حلقة ماجد المصري اللي اتذاعت في يوم 19 مايو.

وقال طارق سعدة في بيان، إن بسمة وهبة كمان خالفت قانون نقابة الإعلاميين رقم 3 لسنة 2016، اللي بيحظر ممارسة النشاط الإعلامي من غير التسجيل في النقابة أو الحصول على تصريح بمزاولة المهنة، وبسمة وهبة مش مقيدة في جداول العضوية ولا معاها تصريح بمزاولة المهنة.

ورغم إن الهجوم في حلقة ياسمين الخطيب كان مركز على بسمة وهبة، إلا إن حلقة ماجد المصري هي كمان اتقابلت بانتقادات عنيفة، لكن المرة دي بسبب تصريحات الضيف اللي اعتبرها الجمهور عنصرية، وساهمت بشكل أو بآخر في زيادة حالة الغضب من البرنامج.

وبعد كده قدمت بسمة وهبة استقالتها من قناة "القاهرة والناس"، وأول ظهور ليها كان في فيديو على "إنستجرام" في الحرم المكي وهي بتعمل عمرة وقالت إن دي من أجمل المرات اللي أدت فيها العمرة وحاسه براحة نفسية كبيرة.

Comments: