٧ طرق جسمك بيقولك بيهم إنه مش مبسوط: نقص في هرمونات السعادة

27/05/2019

السعادة مش مجرد موقف أو سلوكيات إيجابية الشخص بيمشي عليها في حياته، لكنها كمان عملية كيميائية في الجسم والمخ، وليها علاقة بالهرمونات اللي بتلعب أهم دور عشان الشخص يبقى سعيد، نقص الهرمونات دي بتبقى أكبر سبب يخلي الشخص يعاني من الاكتئاب أو الحزن.

موقع Brightside قال إن فيه علامات بتدل على إن هرمونات السعادة مستواها قليل في الجسم وهي:

1- بتاكل شيبسي وشوكولاتة:

لو جسمك محتاج سكريات أو نشويات فده معناه إن مستوى هرمون السيروتونين المسبب للسعادة قليل في جسمك، والأكل ده بيزود هرمون السيروتونين، واللي هيحصل بعد ما تاكل نوع الأكل ده إن موودك هيتحسن وهتحس إنك أحسن بس لفترة قصيرة، وبعد كده الهرمون هيقل تاني وهتحس إنك محتاج تاكل الأكل ده تاني عشان جسمك يفرز الهرمون تاني، وهكذا.

2- وزنك هيزيد:

قلة الدوبامين هتزود فرصة إن وزنك يزيد، غير طبعا إن الحلويات والنشويات بتزود الوزن، وده بيحصل لإنك بتحاول تلحق مستوى الهرمون اللي بيقل عن طريق الأكل، الموضوع ممكن يتطور لإنك تدمن نوعيات معينة من الأكل.

3- ألم في الثدي:

نقص الهرمونات اللي بتأثر على مزاجنا أوقات كمان بتأثر على صحتنا وجسمنا، زي الوقت بتاع "البيريود" بيكون فيه نقص في هرمون الأستروجين في الجسم، وعشان كده الست بتعاني من وجع أو ألم في الثدي.

4- قلة التعاطف:

الدراسات لقت إن فيه علاقة بين الحب وهرمون الأوكسيتوسين، وإنه بيأثر علينا وعلى جسمنا زي باقي الهرمونات، فلو كان عندك مشكلة في إنك تتعاطف مع الناس أو تتعرف على الانطباعات اللي بتبقى على وشوشهم، فغالبا ده نقص في هرمون الأوكسيتوسين.

5- الصداع:

ممكن الصداع يحصل بسبب نقص هرمون البروجسترون  وهو هرمون كمان له علاقة بتحسين الحالة المزاجية، نقص الهرمون ده بيعبر عنه الجسم بألم الصداع النصفي، هرمون البروجيسترون مهم جدا كمان في الفترة بتاعت الحمل، عشان كده أعراض نقص البروجسترون  بتختلف ولازم يتم السيطرة عليها.

6- الأرق:

عموما الأرق هو واحد من أهم أعراض انخفاض مستوى السيروتونين اللي اتكلمنا عنه قبل كده، وتأثره بيكون إنه بيعمل مشاكل في النوم وبيسبب تغيرات في المزاج، وبالنسبة للأرق اللي بيعانوا من الإجهاد بصورة مستمرة والاكتئاب أو حياتهم نمطية هما معرضين أكتر إن يجيلهم أرق.

7- الرعشة:

الرعشة أو الهزة اللي بتكون في الإيد بتحصل بسبب نقص هرمون الدوبامين، الرعشة دي بتكون عبار عن حركات لا إرادية في الجسم مش شرط الإيد بس وسببها هو تقلص في العضلات في معظم الأوقات، وممكن كمان تكون عرض من أعراض مرض عصبي.

Comments: