مسلسل "ما وراء الطبيعة".. عمرو سلامة هيحقق حلم جيل التمانينات على Netflix

27/05/2019

في فترة معينة في حياة جيل التسعينات والتمانينات (لما بقوا كبار شوية)، كان أهم أحداثها هي سلسلة "ما وراء الطبيعة" لدكتور أحمد خالد توفيق، اتعلقوا فيها بالبطل والأحداث جدا، لإنها سلسلة روايات مكونة من 80 عدد وده رقم كبير إلى حد ما، وده اللي خلى الناس ترتبط بالروايات وأحداثها، وتعيش معاها فترة طويلة، مش بس كده، أغلب الكتاب الشباب - ومنهم الـ Best sellers - اتربوا على الروايات دي وبيعترفوا بفضل دكتور أحمد، ومعاه دكتور نبيل فاروق، بتشكيل خيالهم ووعيهم وإنهم طبعوا بيحبوا القراية والكتابة، السلسلة دي ممكن وصفها بدون مبالغة بإنها واحدة من أهم ملامح الثقافة والتربية لجيل التمانينات.

سلسلة ما وراء الطبيعة أول إصدار ليها كان سنة 1993 وكان اسمها "مصاص الدماء وأسطورة الرجل الذئب" وآخر إصدار ليها كان سنة 2014 واسمها "أسطورة الأساطير"، بطل الرواية هو طبيب متقاعد اسمه دكتور رفعت إسماعيل وأحداث الرواية بتبدأ من سنة 1959، ومن المعروف إنها روايات إثارة ورعب وبتتكلم عن حوادث خارقة للطبيعة بيتعرض لها الطبيب رفعت إسماعيل.

وفي خبر سعيد، "نتفلكس" أعلنت إنها هتنتج مسلسل "ما وراء الطبيعة" عن قصص أحمد خالد توفيق وإخراج عمرو سلامة (عمرو احتمال يكون الـ Producer أو الـ Showrunner مش المخرج) وإنتاج محمد حفظي، وتعتبر  رواية "ما وراء الطبيعة" من أكتر الروايات مبيعا وحققت بيع أكتر من 15 مليون نسخة.

وقال المنتج محمد حفظي لموقع Hollywood Reporter إنه "فخور إنه هيشتغل مع نتفليكس عشان يحيي سلسلة الروايات الأقرب لقلبه، وقال كمان إنه متحمس إنه هيشتغل مع عمرو سلامة تاني وإن بالتعاون مع نتفليكس هنقدم مسلسل بجودة عالمية عشان يحققوا طموحات الدراما المصرية والعربية".

وقال عمرو سلامة إنه متحمس جدا للمسلسل، وإنه كان بيحلم إنه يحول أساطير أحمد خالد توفيق لعمل درامي من أول ما قرر يشتغل مخرج، وقال كمان إنه فخور بتقديم الرواية برؤية جديد مع الاحتفاظ بجوهرها الأساسي.

ومتوقع إن المسلسل هيتصور في مصر، وهيكون تالت مسلسل في إنتاجات "نتفليكس" الأصلية في الوطن العربي، في الآخر "نتفليكس" صرحت وقالت إنهم متحمسين لمواصلة إنتاجهم في الشرق الأوسط وإنهم متحمسين إنهم هيتعاونوا مع محمد حفظي وعمرو سلامة المعروفين بإبداعتهم في المنطقة.

Comments: