"جوجل فاميلي".. أبلكيشن جديد لحماية الأطفال وتنظيم وقتهم على الإنترنت

28/05/2019

لو إنت أب/ أم/ أخ كبير، وخايف على ولادك من التعرض للإنترنت بعيد عن عينك، وخايف يتعرضوا لمحتويات إباحية أو abusive لطفولتهم بأي شكل، ولو خايف من إصاباتهم بأعراض نفسية زي الانعزال وحب الوحدة بسبب الوقت الطويل اللي بيقضوه عليه، واللي بيوصل أحيانا لـ 10 ساعات في اليوم عند بعض الأطفال والمراهقين، "جوجل" عملت أبلكيشن "جوجل فاميلي" اللي هيخليك تسيطر على تعرض ولادك للإنترنت، من خلال خواص "Google Family Link".
 

اللطيف في الأبلكيشن، إنه هيوفر قدر كبير جدا من المتابعة والحماية للأطفال من أي محتوى غير مناسب ليهم، وفي نفس الوقت من غير ما تديهم إحساس المراقبة الدايمة اللي بيدفع غالبا للاتجاه العكسي وبيخلي الطفل يعند أكتر، أو يحاول يوصل للممنوع عنه، ودي طريقة تشغيل الأبلكيشن وأبرز مميزاته:

- طريقة التشغيل:

1- على موبايل أو تابلت الطفل، اعمل إيميل وحدد السن بأقل من 13 سنة

2- اربط جهاز الطفل بأبلكيشن "جوجل فاميلي"

3- دخل على موبايل الطفل، إيميلك كولي أمر عشان تجيلك التقارير وتقدر تتحكم من موبايلك إنت 

- مميزات الأبلكيشن:

1- هتشوف الطفل بيعمل إيه من خلال تقارير عن الوقت اللي بيقضيه على كل أبلكيشن 

2- عشان الطفل يداونلود أي أبلكيشن لازم ياخد موافقتك الأول، وتقدر كمان تخفي أبلكيشنز معينة من على "جوجل بلاي"

3- هتقدر تدخل أبليكشنز معينة إنت شايف إنه مهمة أو مفيدة ليه على موبايله أو التابلت بتاعه مباشرة

4- هتقدر تحدد مدة معينة يستخدم فيها الطفل جهازه يوميا عشان مايفضلش عليه 24 ساعة، ويقدر يكون عنده حياة اجتماعية ونشاطات تانية زي القراية والمذاكرة، الجهاز بيفصل تلقائيا بعد انتهاء المدة اللي إنت بتحددها

5- تقدر تقفل الموبايل تماما عن بعد، إذا كان ده وقت اللعب أو الغدا أو المذاكرة ومش عايز طفلك يهرب ويمسك موبايله، ممكن تقفله لمدة محددة

6- الأبلكيشن هيخليك تتابع مكان طفلك لو هو بره البيت عن طريق تحديد اللوكيشن بتاعه
 

Comments: