دراما في نهائي أرسنال - تشيلسي: وداع وعنصرية وصراعات سياسية

29/05/2019

في مواجهة إنجليزية - إنجليزية، العالم كله بيفترج على نهائي النسخة الـ 48 من الدوري الأوروبي (يوروبا ليج) بين أرسنال وتشيلسي، واللي بيقام على الملعب الأولمبي في مدينة "باكو" عاصمة أذربيجان، النهائي ده ليه خصوصية كبيرة عن أي نهائي أوروبي تاني نظرا لكمية الأحداث السياسية والدرامية والوداعات اللي مستنية لاعيبة ومدربين من تشيلسي وأرسنال:

1- أمل أرسنال

النهائي ده هو الأمل الأخير لأرسنال في الخروج بإنجاز من الموسم، وهو الأمل الأخير برضه في التأهل لدوري أبطال أوروبا السنة الجاية بعد ما خلص الدوري في المركز الخامس وفشل في التأهل للتشامبيونز ليج مباشرة، وهو من ناحية تالتة فرصة لكتابة التاريخ لأن "الجانرز" ماكسبوش الدوري الأوروبي ولا مرة قبل كده، وأكبر إنجاز ليهم في البطولة كان الهزيمة في النهائي قدام جالطا سراي التركي سنة 2002.

2- ماتش الوداع

الماتش ده هو الوداع والسلام الأخير لإيدن هازارد، محبوب جماهير تشيلسي، مع جماهيره قبل ما يتأكد انتقاله رسميا لريال مدريد في الموسم الجاي، الجماهير مستنية "إيدن" يحييها ويشكرها ويشكروه على الفترة اللي فضل فيها واحد من أعمدة النادي، الوداع التاني هو الوداع المرتقب لمحمد النني لجماهير أرسنال بعد ما أكدت تقارير إنجليزية إن "أوناي إيمري"، مدرب الجانرز، حدد اللاعيبة اللي هيستغنى عنهم، واللي كان من ضمنهم النجم المصري محمد النني.

3- دراما واتهامات بالعنصرية

أما الوداع التالت فهو رحيل فاتر وغير مرحب بيه من الأساس، لمدرب تشيلسي ماوريسيو ساري، اللي ارتبط بعلاقة غير جيدة على الإطلاق مع جمهور "البلوز"، على مدار الموسم لدرجة إنهم أطلقوا ضده صافرات استهجان، عكس خليفته الإيطالي أنطونيو كونتي، اللي هتفت له الجماهير لحد آخر لحظة ليه في النادي.

"ماوريسيو ساري" اتأكد رحيله عن النادي اللندني في نهاية الموسم،  بعدما طالته اتهامات بالعنصرية ضد اليهود، لما تخلف عن زيارة بعثة تشيلسي للنصب التذكاري لضحايا الهولوكوست في "بوسطن" بأمريكا، خصوصا وإن مالك "تشيلسي" هو رجل الأعمال اليهودي رومان أبراموفيتش.

4- صراع سياسي/ تاريخي

الأرميني هنريك مختاريان، واحد من أهم لاعيبة أرسنال الموسم ده، مش موجود في قايمة الفريق اللي سافرت لـ"باكو" نظرا لصراعات سياسية تاريخية بين بلده أرمينيا وبين أذربيجان، بدأت بالحرب الأرمينية الأذربيجانية في 1918، واللي اتجددت آخر مرة في اشتباكات عكسرية حصلت في أبريل 2016 بعد خرق الهدنة بينهم.

التوتر وصل لدرجة إن الشرطة الأذربيجانية كانت بتعترض مشجعين أرسنال اللي لابسين تي شيرت "مختاريان"، وحفاظا على حياة اللاعب، قررت إدارة أرسنال عدم سفره لـ"باكو" من الأساس، مع أسفها إنه مش هيحضر حدث كبير زي ده لفريقه، الفيديو الجاي لظابط أذربيجاني بيوقف مشجع لابس تي شيرت "مختاريان"


5- غيابات وإصابات

في تشيلسي، هيغيب مسمار نص الملعب، الفرنسي نجولو كانتي بسبب إصابة في الركبة، أما كالوم هودسون أودوي وروبن لوفتوس تشيك، فهيغيبوا عن الماتش بسبب عدم تعافيهم الكامل من إصابات في وتر أكيلس، وفي الناحية التانية، هيغيب هنريك مختاريان لأسباب سياسية وأمنية زي ما قلنا.

6- دراما +

بيتر تشيك، هو واحد من الحراس التاريخيين لنادي تشيلسي، لعب للبلوز أكتر من 10 سنين، لكنه انتقل في آخر 3 مواسم ليه في تاريخه لنادي أرسنال، المفارقة إنه هيلعب نهائي الدوري الأوروبي مع أرسنال ضد فريقه القديم، عشان ينهي علاقته بأرسنال ويرجع لتشيلسي تاني كواحد من طقم الإداريين في النادي، عشان كده جمهور أرسنال طالبوا "أوناي إيمري" بعدم مشاركة "تشيك" وهي المطالبات اللي رفضها "إيمري" تماما.

Comments: