إجابات لسؤال: مين اللي قتل فريدة في "زي الشمس"؟

30/05/2019

مسلسل "زي الشمس" كل كام يوم يحصل فيه أحداث جديدة تخليه أهم تريند الناس بتتكلم عنه، وده عشان بيتكلم عن جريمة قتل غامضة وأحداثه فيها تشويق، وطبعا بكل سهولة نقدر نعرف مين اللي قتل فريدة لما ندور على النسخة الإيطالية من المسلسل ونشوف النهاية في آخر حلقة، بس غير إنه شيء سيء لما تحرق لنفسك أحداث مسلسل إنت مستمتع بيه، فهو كمان شيء غير متوقع إن النسخة المصرية تكون متاخدة بالظبط من غير أي تغيير في الأحداث.

ولو فكرنا شوية إيه علاقة اسم المسلسل بالأحداث هنلاقي إن اسمه "زي الشمس" واسمه ده بيدل على إن ساعات الحقيقة بتكون واضحة قدامنا زي الشمس بس مش شايفينها، ده غير إن ريهام عبد الغفور حطت ستوري على "إنستجرام" بتاعها وقالت فيها إن اللي قتل فريدة شخص غير متوقع، فغالبا هيبقى حد مايتشكش فيه إن هو اللي قتل فريدة، لكن الناس على السوشيال ميديا وفي الحقيقة بدأوا يتوقعوا فعلا مين اللي قتل فريدة وكانت التوقعات:

1- أحمد السعدني (عمر)

غالبا لإن حد اتفرج على النسخة الإيطالية ولقى إن الدور الموازي لـ"عمر" هو القاتل، وعشان كمان هو أكتر واحد بيكدب في تحقيقات النيابة، وهو كمان أكتر واحد له مصلحة في عدم وجود فريدة عشان ياخد منها الأولاد، وكان رافع عليها قضية قبل ما تموت، طبعا غير ظهوره في الأحداث والحلقات الأخيرة إنه كان بيراقبها، كل التفاصيل دي بتزود احتمالية إنه يكون القاتل

2- أحمد مالك (سيف):

لإنه كان بيحب فريدة حب جنوني وكانت بتصده عشان استحالة العلاقة، ده غير إن "سيف" بيدي دايما انطباع للناس في المسلسل إنه مريض نفسي، وبغض النظر عن هو اللي قتلها أو لا، فهو أقنعنا شوية إن فريدة لسه عايشة ومامتتش

3- جمال سليمان (جمال المحامي):

في آخر كام حلقة ظهر مع فريدة في الأحداث، أول ما اتطلقت منم عمر راحت للمحامي جمال اللي كان بيدرب أختها نور معاه في مكتبه، وكان فيه مشهد فريدة بتقول فيه لنور إنها عايزة تقول لها حاجة مهمة لكن كعادة نور بعد خناقتهم ماوفقتش تسمعها، وبعد كده ظهر نتيجة تحليل ليوسف ابن فريدة الصغير وكانت بتدل إنه مش ابن عمر، فتجميع الأحداث كده بيقول إن كان فيه حد تاني بدل عمر له مصلحة أكبر إنه يقتل فريدة، واللي غالبا بنشك إنه جمال المحامي.

4- دينا الشربيني (نور):

علاقة الأختين ببعض كانت متدمرة، فريدة تقريبا خدت حاجات كتير من نور زي حب مامتهم وخطيبها وطبعا برغم كل الحب اللي نور بتحبه لفريدة إلا إن نور ممكن تبقى بتعاني من مشاكل نفسية بسبب أختها، وظهر كمان إن نور كانت بتعاني من مشاكل في الطفولة لما دكتور خالد عملها تنويم مغناطيسي، وده اللي بيدي احتمالية إن نور تكون هي اللي قتلت.

5- أحمد السقا في "ولد الغلابة":

بما إن أحمد السقا (عيسي) في ولد الغلابة طالع بيقتل بس، وقتل لحد دلوقتي ييجي 4 كده، فليه لأ يعني!

6- قابيل:

هو تاني أبرز قاتل في رمضان السنة دي، وبما إن المسلسلين بيتعرضوا ورا بعض وعلى نفس القناة، يبقى ليه لأ برضه..

Comments: