مصور يوثق "جوانب خفية" من المسجد النبوي: صور ماشفتهاش قبل كده

31/05/2019

7 سنين كاملة، قضاها المصور السعودي أمير قيصران في توثيق جوانب وزوايا غير مرئية من المسجد النبوي في المدينة المنورة، في مشروع عنوانه "جوانب خفية من المسجد النبوي"، قدر فيه "قيصران" ياخد لقطات مختلفة عن اللي بنشوفها للمسجد يوميا في التلفزيونات وعلى الإنترنت.

"قيصران" وثق المشروع في كتاب اسمه "مسجدي هذا"، وقال في تصريحات لشبكة CNN إنه بيوثق أبعاد غير مرئية في المسجد النبوي في رحلة تصوير استغرقت 7 سنين، وأكد إن اللي شجعه يبدأ مشروعه هو إنه في كل مرة كان بيزور فيها المسجد النبوي كانت عينه بتقع على "جوانب لم توثق"، وعلى جمال خفي وتفاصيل وزخارف ماحدش ركز على تصويرها قبل كده، وده اللي دفعه يعمل "ديوان فوتوغرافي" يوثق فيه التفاصيل دي.

الكتاب بيتضمن 300 صورة، وبيوثق رحلة الزائرين من الصلاة، لزيارة الروضة الشريفة ثم جوانب المسجد النبوي، ثم القبة،والساحات الخارجية، الكتاب كمان كان في صور للعمال أثناء تنضيف الثريات الكبيرة اللي نازلة من سقف المسجد.

المصور "قيصران" قدر كمان ياخد صورة للقمر العملاق "سوبر مون" وهو بيتوسط المنارتين بتوع المسجد، وقال إن القمر مش هيظهر بالحجم ده تاني قبل 2034.

Comments: