"نيمار" بيرد على اتهامات اغتصاب بنت: طبيعي يحصل بين 4 حيطان

02/06/2019

البرازيلي نيمار نجم "باريس سان جيرمان"، نفى في تصريحات له الاتهامات باغتصاب بنت في باريس، واللي اتهمته بإنه اعتدى عليها جنسيا في واحد من فنادق باريس، وقدمت بلاغ في شرطة ساو باولو، وقالت فيه إنه استخدم العنف عشان يعمل معاها علاقة بغير إرادتها.

البنت اللي غير معروف اسمها لحد دلوقتي، قالت إنها تعرف "نيمار" من السوشيال ميديا خصوصا من "إنستجرام"، ورتبوا إنهم هيتقابلوا في باريس في فندق " سوفيتيل باريس آرك دو تريومف"، وقالت في محضر الشرطة إنه بعتلها تذاكر الطيران، وحجز لها في الفندق، وقالت كمان إنه كان سكران، وإنه بعد ما اتكلم معاها بدأ يلمسها ومارس معاها الجنس بعنف، وقالت كمان إنها رجعت بعد يومين من الحادثة من غير ما تبلغ الشرطة الفرنسية باللي حصل لإنها كانت في صدمة عاطفية وخافت كمان تبلغ وهي في بلد غريبة.

وعشان يثبت براءته وإن الموضوع ماوصلش لدرجة الاغتصاب، "نيمار" رد بصور و"سكرين شوتس" من محادثات كانت بينه وبين البنت اللي كانت بتقوله فيهم إنها راحت الجيم مخصوص عشان تبقى مثالية بالنسبة له، وصور كمان ظهرت فيها البنت وهي بالـ" بكيني" وصور تانية عريانة، وقال إن هيكشف كل المحادثات اللي بينه وبينها وإن الكلام بينهم كان ودي جدا وضروري إنه يكشف كل حاجة عشان يبين إن ادعاءاتها غير صحيحة، وأضاف كمان اللي حصل ده طبيعي إنه يحصل بين راجل وست قاعدين بين أربع حيطان لوحدهم وإن اليوم اللي بعد كده ماحصلش أي حاجة سيئة، وإن ده كان فخ ووقع فيه، وده معناه إنه بيعترف إن في حاجة حصلت فعلا، لكنه برضا البنت مش غصب عنها.

نيمار قال في فيديو على "إنستجرام": "بيتهموني بالاغتصاب، ده شيء قاسي ومحزن جدا واللي عارفني عارف إني مش ممكن أعمل حاجة زي كده"، وعلق على السكرين شوتس والصور العريانة وقال "لحظات حميمية، بس ضروري الناس تشوفها عشان تعرف إنه ماحصلش حاجة كبيرة"، وأكد "نيمار" هو ووالده ومدير أعماله في نفس الوقت، إنها محاولة لابتزاز النجم البرازيلي وإنهم محتفظين برسايل "الواتساب" اللي بيعتبروها دليل براءتهم.

والجدير بالذكر إن نيمار تم وقفه من الاتحاد الفرنسي لـ 3 ماتشات بعد ضربه لواحد من المشجعين بعد هزيمة فريقه باريس سان جيرمان، أمام فريق رين في نهائي كاس فرنسا الشهر اللي فات.

Comments: