حوار مع مخرج ومؤلف إعلانات NBK: اخترنا الممثلين من 1200 مرشح.. ووصلنا الرسالة بشكل خفيف

10/06/2019

إعلان بنك الكويت الوطني NBK واحد من أنجح إعلانات رمضان السنة دي، رسالة سريعة وخفيفة وبتضحك، وجملة سهلة في الآخر بتركز على مخاوف الناس من البنوك، واللي الإعلان بيلخصها في النهاية وبيقول إنه قدر يحلها بتعاملاته السهلة "لو متعقد من البنوك/ القروض.. تعالى NBK"، مجلة Think Marketing المتخصصة في التسويق والإعلانات نشرت إحصائية عن إن حملة بنك الكويت هي أكتر حملة إعلانية لبنك ضحكت الناس على السوشيال ميديا بأكتر من 22 ألف Haha reaction.

 وعموما بنك الكويت الوطني قدر في الفترة الأخيرة بعد تواجده في مصر ياخد ثقة العملاء، خصوصا وإنه بنك عريق اتأسس سنة 1952 كأول بنك وطني كويتي وأول بنك في منطقة الخليج، مع التنوع الكبير في الخدمات المصرفية والاستثمارية اللي بيقدمها.

 وبعد نجاح الإعلان، كان لازم نحاور هاشم السكري، وهو اللي كتب وأخرج الإعلان بالمشاركة مع أكرم نجم، مهم كمان نقول إن هاشم وأكرم شغالين في مجال الكتابة عموما والإعلانات  من 2007، اشتغلوا في أغلب الشركات المالتي ناشيونال، وخدوا جوايز في معظم المهرجانات العالمية، من "كان" لـ"كليو" لـ DN Ad و"دبي لينكس"، وغيرهم، بعدد وصل لأكتر من 35 جايزة، وعلى مدار المدة دي كلها، اتعود هاشم يشارك أكرم في الكتابة والإخراج من خلال شركة Storyteller اللي أسسوها وبيديروها مع بعض، وده كان نص حوارنا مع هاشم السكري:
 

* نجاح كبير للإعلان في موسم زحمة الإعلانات.. احكي لنا القصة من بداية الاتفاق

- في نص شهر مارس 2019 قعدنا مع فريق الـ Communication في بنك الكويت الوطني، واللي بترأسه ماريان مقار، دايما الفترة الأولى دي بتبقى مرحلة التفكير للاستقرار على اتجاه معين أو concept نمشي وراه، بيبقى السؤال إحنا هننزل في رمضان بإيه؟ هننزل بحاجة Hard Sell نبيع بيها المنتج أو الخدمة، ولا نعمل Awareness ونوصل بيه رسالة مختصرة وخفيفة من غير ما نخوض في تفاصيل المنتج اللي بنقدمه ونكتفي بس بشد الناس للبراند عشان يروحوا يسألوا أو يكلموا البنك، إحنا في Storyteller بنفضل المدرسة التانية، إننا نعرف الناس بالبراند ومن خلال التعريف نقدر نبيع، عشان كده الطريقة دي بتجيب فلوس على الـ Long Term.
 

* وبعد ما اتفقتوا على الاتجاه العام؟

- قعدنا نفكر مع ماريان وفريق الـ Communication في البنك لغاية ما وصلنا إننا نعمل حاجة فيها Awareness بدون دخول في تفاصيل كتيرة عن المنتج أو الخدمة، إعلانات التلفزيون مش وظيفتها إنها تقول المعلومات الكاملة، الإعلان هدفه توصيل الرسالة الرئيسية والناس بعد كده تتكلم وتستفسر، وعموما الاستقرار على الاتجاه ده خد 10 أيام شغل

* الكتابة خدت منك إنت وأكرم وقت قد إيه؟

- خدنا أسبوعين طلعنا فيهم فكرة وكتبنا التصور والسكريبت، عايز أشرح إن مرحلة طلوع الفكرة بتمر بشوية خطوات، لازم في الأول نتفرج كتير أوي عشان مايحصلش أي تشابه مع أي إعلانات تانية، الحاجة التانية المهمة إن رمضان ليه طبخته، الإعلان اللي صوته هادي هيعدي ومحدش هياخد باله منه، عكس الوقت اللي مفيهوش ترافيك إعلانات، لكن في رمضان عندنا 25 إعلان مع بعض، عشان كده الفكرة ممكن تكون حلوة لكن مش لايقة على رمضان، رمضان محتاج حاجة Iconic وصوتها عالي.
 

* هل كتابة إعلان لبنك ليه خصوصية عن أي منتج استهلاكي عادي؟

- أكيد، أثناء الكتابة بنفكر إحنا بنبيع إيه، اللبان أو الشوكولاتة فيهم مساحة من الحرية و"الهبل" لأنهم في النهاية لبان وشوكلاتة وممكن تهزر براحتك، لكن لما بتبيع بنك - حتى لو هتعمل هزار- لازم يكون محسوب، ماينفعش هزار من أجل الهزار، ممكن أكون cool بس لازم أقول حاجة ليها معنى.
 

* وبعد الكتابة؟

- دايما بعد ما تكتب سكريبت أو فكرة، يفضل إنك تسيبها يوم أو يومين، لأن ممكن دلوقتي بنتكلم في مود حلو فأقولك نكتة تضحك عليها، بس ممكن بكره النكتة ماتعجبكش، الفكرة لازم تتساب يومين وترجع تقيمها تاني

* إيه أكتر حاجة كنتوا مركزين فيها وإنتوا بتفكروا في الإعلان؟

- في رمضان إحنا بنستهدف جمهور التلفزيون العريض، وطالما بنكلم الناس كلها يبقى لازم الحاجة تبقى مرتبطة بالناس كلها، عشان كده قررنا نبني على إحصائية أو معلومة حقيقية، المعلومة هنا إن أغلب الناس عندهم عقد من البنوك والقروض والكريدت كارد، قررنا نركز على المعلومة ده وتبقى هي موضوع اللاين الأخير في الإعلان، إنه لو عندك عقدة (وهي حاجة عند كل الناس)، فتعالى بنك الكويت الوطني
 

* ده كله عن الكتابة.. احكي لنا عن تجربة إخراج الإعلان

- أنا وأكرم أخرجنا الإعلان مع بعض زي ما كتبناه، الإعلانات اللي بيكون فيها تمثيل وسكريبت ونوع معين من الهزار، بيبقى غالبا أصح إن الشخص اللي كتبها يخرجها -لو يعرف يخرج- أنا وأكرم نزلنا تصوير مع مخرجين في أكتر من 100 إعلان كتبناه وبقى عندنا الخبرة الكافية إننا نصور النوع ده من الإعلانات، والكلاينت رحب جدا.
 

* اختيار الممثلين هنا صعب لأن الإعلان قصير وأي حاجة بره السياق هتببظ الدنيا؟

- كان معانا مساعدين إخراج بنقولهم طلباتنا في التمثيل، إحنا من مدرسة الـ real اللي بيطلع منها هزار، مش من مدرسة كوميديا الـ farce، مساعدين الإخراج رشحوا الممثلين من مكاتب الكاستنج، اخترنا في النهاية 14 ممثل ظهروا معانا في الـ 3 إعلانات، من ضمن 1200 ممثل اتعرضوا علينا واتفرجنا عليهم، ركزنا إننا نجيب ممثلين هواة أو ماظهروش كتير عشان يكونوا فريش ومش محروقين، لكن المشكلة في الممثل الفريش "إنه ممكن يخيش".

* وإيه اللي بيسهل الوصول لإعلان مناسب لتصورات الـ Client؟

- لما الكلاينت بيكون متفاهم وفاهم يعني إيه إعلانات -وده موجود في التيم بتاع بنك الكويت- ولما بيدوا مساحة للـ Agency إنها تتحرك وتتطلع شغل بروقان، المشاكل بتقل جدا.
 

* هل توقعتوا أو كنتوا ضامنين نجاح الإعلان بالشكل ده؟

- أي حد يقول إنه بيضمن النجاح 100% يبقى بيخرف، لكن في تجهيزات وخطوات بتضمن تحقيق نسبة نجاح، ودي بتيجي بالخبرة والمذاكرة والعلاقة الكويسة بين الـ Agency والـ Client.

Comments: