مؤلفة “زي الشمس” لـ The Glocal: الشركة المنتجة هتنزل بيان رسمي عن نهاية المسلسل

04/06/2019

النهاردة كانت الحلقة الـ 30 والأخيرة من مسلسل "زي الشمس"، المسلسل اتشهر جدا وكان تريند طول شهر رمضان على السوشيال ميديا بسبب أحداثه الغامضة اللي كانت بتتكلم عن جريمة قتل "فريدة" ريهام عبد الغفور، أخت نور "دينا الشربيني"، واللي خانتها وحملت من خطيبها.

لكن نهاية المسلسل كانت غريبة للبعض وغامضة ومش مفهومة للبعض الآخر، وعشان كده ظهرت صفحة باسم المسلسل اسمها "مسلسل زي الشمس" وهي مش الصفحة الرسمية للمسلسل وقالوا الكلام ده.


وكان التفسير غامض برضه بالنسبة للناس، والأكتر غرابة هو إن صناع مسلسل يضطروا يشرحوا نهايته على السوشيال ميديا رغم إن كان قدامهم 30 حلقة يشرحوا ويتكلموا فيهم، وبعد البيان المنسوب لصفحة باسم المسلسل، انتشر تعليق تاني لواحدة من فريق عمل المسلسل -حسب كلامها-:
 

وعشان نوصل للخبر الأكيد، أو توضيح لنهاية المسلسل من صناعه، كلمنا نجلاء الحديني اللي كتبت معالجة المسلسل تحت إشراف السيناريت مريم نعوم واللي قالت إن الشركة المنتجة للمسلسل لسه هتطلع بيان رسمي عن الكلام المنتشر عن النهاية، وقالت كمان "عشان فيه كلام كتير أوي بيتقال فاحنا مستنين يبقي فيه كلام موحد مننا، عشان مايبقاش كل واحد بيقول حاجة".

منتج المسلسل محمود مشيش، قال على حسابه الرسمي على "تويتر" إن "زي الشمس" ملوش أي صفحات على "فيس بوك"، وبالتالي البيان المنتشر Fake.

Comments: