رسالة مؤثرة من صديق عمر القاضي بعد استشهاده: هنمسح بيهم رمل سينا

05/06/2019

حادث إرهابي مؤلم حصل في أحد كماين الشرطة في العريش أثناء صلاة العيد، واللي راح ضحيته عدد غير معلوم حتى الآن من الضباط والعساكر، واللي مانقدرش نجزم بيه إلا بعد صدور البيان الرسمي، لكن من ضمن الشهداء، الظابط عمر القاضي اللي هزت قصته والكلام اللي بيتقال عنه المصريين كلهم.

محمد عامر، ظابط شرطة وواحد من أصدقاء الشهيد القاضي وبتجمعه بيه أكتر من صورة، نشر رسالة مؤثرة وأكتر من محادثة بينه وبين "القاضي" على "واتساب" وهما بيسألوا على بعض، وبيتكلموا عن شغلهم في سينا.

"عامر" نعى صاحبه واتكلم عن ذكريات مؤثرة بينهم وقال "حقك عليا يا صاحبي  بس إنت تستاهلها، تستاهل تبقي في أحسن مكان في الجنة،
أنا آسف يا صاحبي لما زعلت منك وإنت اللي جيت صالحتني، أنا آسف لما كنت بتعمد أشغل نور الاستراحة عشان تصحى وتقوم تزعقلي وتقولي هضربك بالنار يا عامر اطفي النور، بس كنت عايزك تقعد معايا".

وكمل رسالته "وبحق اليوم المفترج ده وقدام الناس كلها لنمسح بيهم رمل سينا، وكل نقطة دم منك يا صاحبي لتنزل منهم أضعاف أضعاف، وبحق كسرة قلبي عليك ليندموا ويعرفوا إن عندك أخوات لو إنت موت فهما لسه عايشين.. نام يا صاحبي النهارده، وبكره نتقابل".

Comments: