بعد انتقاله لريال مدريد: 7 إحصائيات بتؤكد إن "هازارد" هو مستقبل "الملكي"

07/06/2019

أكتر من 3 سنين هي مدة كلام العالم كله عن انتقال مرتقب لإيدن هازارد من تشيلسي لريال مدريد، عشان يتأكد الكلام وينضم النجم البلجيكي رسميا للريال في صفقة وصلت لـ 100 مليون يورو، وفي أكتر وقت مثالي للطرفين.

من ناحية ريال مدريد، فهو مر بأسوأ مواسمه من 6 سنين تربع فيهم على عرش أوروبا، وحقق أرقام قياسية غير مسبوقة بأداء ممتع مع زيدان ومن قبله أنشيلوتي، وقدر يحصد في السنين دي لقب دوري و4 دوري أبطال و4 كاس عالم للأندية وبطولة كاس محلي وبطولة سوبر محلي و3 سوبر أوروبي، عشان ينخفض مستواه بشكل غريب ويفشل في حصد أي بطولة السنة دي ويقدم أداء هزيل.

أما من ناحية هازارد، فهو مر بأفضل مواسمه مع تشيلسي من ساعة ما انضم ليه من "ليل" الفرنسي من 7 سنين، وختم علاقته بـ"البلوز" بذكرى جميلة، وهي المشاركة في الفوز بـ"اليوروبا ليج"، وبالتالي انخفاض مستوى ريال مدريد وطموحه في بناء فريق جديد تحت قيادة زيدان، محتاج لاعب قائد في الملعب زي "هازارد" اللي في نفس الوقت بيعيش أفضل حالاته الفنية، ده بخلاف حبه الشديد لريال مدريد ورغبته في الانتقال للملكي من أكتر من سنة.

ريال مديد مش بس محتاج لاعب قائد أو نجم كبير عنده القدرة إنه يشيل الفريق فنيا وحتى على المستوى النفسي، هو كمان محتاج على الأرض صانع ألعاب فعال عنده قدرة إنه يوصل المهاجمين لمرمى الخصم بسهولة، وبأقل عدد ممكن من اللمسات، سواء بالباصات البينية أو الكروسات الطويلة اللي "هازارد" ناجح فيها بشكل كبير، وده الدور اللي كان بيقوم بيه -جزئيا- كريستيانو رونالدو قبل رحيله ليوفنتوس، مع لوكا مودريتش وتوني كروس قبل انخفاض مستواهم.

الإحصائيات الجاية -واللي جمعها موقع سكاي سبورتس - بتؤكد ليه "هازارد" هو صفقة الموسم في العالم كله، وبداية بناء فريق جديد للريال:

1- أكتر لاعب صنع أهداف في الدوي الإنجليزي موسم 2018/ 2019 برصيد (15 هدف)

2- تاني أكتر لاعب صنع فرص أهداف في الدوري (98 فرصة)

3- تامن هدافين البريميرليج، سجل 16 هدف بفرق 6 أهداف عن هداف البطولة (محمد صلاح/ ساديو ماني/ أوباميانج)

4- أكتر لاعب في الدوري الإنجليزي ساهم في أهداف فريقه، تشيلسي سجل الموسم اللي فات 63 هدف، ساهم "هازارد" فيهم بـ 31 هدف ما بين صناعة وتسجيل، بنسبة مشاركة 49% في إجمالي أهداف الفريق

5- "هازارد" عمل 1819 تمريرة طول الموسم بنسبة نجاح وصلت لـ 84.3%

6- نسبة التمريرات الطويلة الصحيحة 84.7%

7- حصل على 104 خطأ (فاول) وارتكب 12 بس

Comments: