8 نصائح هتقولك إزاي تاخد قرار صح وبسرعة
حياتنا هي عبارة عن مجموعة من التجارب اللي بنعيشها بتأثر فينا وبتبني شخصيتنا.. لكن عشان نخوض تجربة معينة ده معناه إننا ناخد قرار ونبدأ فيها..
وكتير مننا بيكون مش عارف ياخد قرار أو محتار.. وده ممكن يضيع مننا فرص كتير في الشغل أو الحياة بشكل عام.. عشان كده هنقولك على شوية نصايح هتفيدك عشان تاخد قرار صح وبسرعة وفقًا لموقع betterup و mindtools
1- خصص وقت في يومك للتفكير
التفكير هنا مراجعة قراراتك اللي قبل كده وتحللها بس ده مش معناه تجلد نفسك.. معناه إنك تتعلم من قرارات الماضي سواء كانت صح أو غلط عشان تعرف تقرر بعدين.
2- عزز ثقتك في نفسك
الثقة هنا ضرورية لأن التردد عمره ما هييجي بعده قرار أبدًا.. ونفرق أوي بين الثقة الطبيعية اللي بنكون مفكرين كويس وفيه جزء مجهول .. وبين الثقة بتاعت أنا جامد وأنا عارف بعمل إيه.. لأن غالبًا بتيجي فوق دماغنا في الأخر.
3- تخيل نتيجة القرار بعد فترة
حاول تفكر وتتخيل بسرعة أنا لو عملت كذا هيحصلي إيه وهكون إيه الوضع؟
على سبيل المثال لو جالك فرصة شغل وانت موجود في شغل بالفعل.. ساعتها تفكر شغلك اللي انت موجود هيوصلك لحد فين؟ ولو العرض الجديد هيضيفلك حاجة وهيخليك احسن.. ساعتها بس هتعرف تاخد القرار.
4- وضع أكثر من خطة بديلة
كل ما كان فيه اختيارات أكثر كل ما كان قرارك النهائي أفضل.. حتى لو حسيت بالتشتت.. لكن هتقدر تشوف الموضوع من كل الزوايا وتقرر وفقًا لأكبر فايدة وأكثر شئ قريب لدماغك.
5- اتعود تكتب أهدافك
كتابة الأهداف دايمًا بتخلي رؤيتك أوضح.. وبتكون مركز أكتر.. وبشكل ما بتكون حاطط خطة مبدأية وبتمشي في تراك معين لحد ماتوصل للهدف بتاعك ولو حصل حاجة مفاجأة بيكون عندك فرصة ساعتها تاخد قرار بديل.. زي مثلا لو انت عندك هدف إنك توصل لمنصب معين في الكارير بتاعك فهتكون قراراتك وفقًا لخطة وهتعرف توصل أسرع.
6- خد رأي حد بتثق فيه لو متاح
وده مش معناه خالص إن قرارك مايبقاش منك.. لكن أحيانًا بنكون محتاجين وجهة نظر مختلفة عن دماغنا تخلينا ناخد بالنا من حاجة ناقصانا وده بيساعد كتير اوي في اتخاذ القرار.
7- خد قرارات صغيرة بسرعة
خلاص عملنا كل اللي فات.. ابدأ تاخد قرارات صغيرة مش مؤثرة أوي ودرب نفسك على السرعة.. زي إنك أنا هاكل كذا أو هتفرج على فيلم كذا.. التدريب ده مع الوقت هيعلمك تشوف كل الجوانب بشكل أسرع.. وكل لما تدرب هتكون أكثر ثقة وراحة في القرارات الكبيرة.
8- ماتخافش من الغلط
لما تيجي تاخد قرار خد احتياطاتك وماتخليش الخوف من النتيجة السلبية يمنعك.. وافتكر إن الغلط وارد وجزء طبيعي من الحياة إحنا مش كاملين.. والغلط هو أكبر درس بيتعلم منه الإنسان عشان يطور من نفسه في المستقبل.
