أشهر 10 خرافات عن البيريود..الاستحمام ممنوع

10/06/2019

كل ست تقريبا بيجيلها البيريود حوالى 450 مرة في حياتها، وبتفقد كمية من الدم ومواد مهمة فيه، عموما العملية كلها مش سهلة يعني، الستات في العموم بتصرف حوالي 6 آلاف دولار على منتجات النظافة الشخصية، محدش بيهتم بالاحصائيات دي ولا الحاجات اللي بتحصل في أجسام الستات خصوصا في وقت "البيريود".

موقع Bright side جمع كل الخرافات اللي ليها علاقة بالـ"بريود" عشان تتخلصي منها وتبقي مرتاحة أكتر:

1- ممنوع تستحمي:

فيه بعض البنات بتتجنب إنها تستحمى وقت البيريود وده لاعتقادهم إن المياه السخنة ممكن تزود النزيف، أو إنهم ممكن يصابوا بعدوى، لكنه مش جرح عشان ينزف، في الحقيقة الحمام الدافي تأثيره بيكون إيجابي جدا لإنه بيحسن عمل الأوعية الدموية وبيريح العضلات وبيقلل من التقلصات، عشان كده بيبقى فرصة أصلا إنك تحسي بتحسن أكبر.

2- مش مسموحلك تنزلي حمام السباحة أو أي مياه مفتوحة (بحر يعني):

ناس كتير بتعتقد إن نزول المياه مضر لصحتهم لكن بالعكس يعني لإن العوم كرياضة بيخفف الألم، بس استخدمي "البادز" المخصوصة للمياه.

3- تزامن أوقات البيريود لما الستات بتعيش مع بعض:

مارثا مكلينتوك هي أول واحدة كتبت ده في مقال عن الطبيعة سنة 1971، وقالت إن البنات اللي بيبقوا عايشين مع بعض زي الصحاب أو القرايب بتجيلهم بالتزامن مع بعض، والسبب هو إنهم بيتبادلوا الفيرومونات مع بعض، لكن الدراسات أثبتت نتايج مختلفة وتزامن وقت البيريود مالوش أي أساس من الصحة وبيتعامل كخرافة في المجتمع العلمي.

4- من الأفضل ماتصبغيش شعرك في الوقت ده:

الخرافة بتقول إنك لو صبغتي شعرك في الوقت ده ممكن اللون مايلقطش في كل شعرك، ناس كتير بترجع ده لسبب الاختلال الهرموني، بس الدكاترة والدراسات أثبتت إنه آه ممكن الشعر يبقى أضعف بس بيتصبغ عادي، وإن الشعر العنيد اللي مابيلقطش اللون ده بيرجع لعوامل وراثية أو عدم العناية والاهتمام لكن تقدري تصبغي شعرك وقت ما تحبي.

5- المشروبات القوية ممكن تأثر على البيريود:

البنات والستات اللي بيشربوا كميات كتير من الخمرة بيبقوا عرضة أكتر إن البيريود تجيلهم بشكل غير منتظم، فكمية قليلة من الكحول في وقت البيريود مش هيدمر مواعيدها.

6- من الأفضل إنك تأجلي إزالة الشعر أو رسم التاتو:

فيه رسامين كتير بيفضلوا يأجلوا رسم التاتو وقت البيريود وكمان أخصائيين التجميل مابيوافقوش يعملوا الحقن البوتكس، لكن مش المفروض إنك تأجلي الزيارة، النتيجة دايما بتعتمد على الخبير، بس خليكي فاكرة إنها ممكن تبقى مؤلمة أكتر.

7- لازم تتحملي التعب وقت البيريود:

آه كل البنات بيتعبوا في الوقت ده، لكن شدته بتختلف، فنسبة 45% لـ 93% من الستات بيعانوا من آلام الطمث، لكن من 3% لـ 33% بيعانوا من الألم الشديد اللي ممكن يبقى منها ارتفاع الحرارة والقئ والدوخة لمدة 3 أيام، ولو ده كل شهر بيمنعك إنك تعيشي حياة طبيعية فالأفضل إنك تروحي لدكتور.

8- استحالة تبقي حامل أثناء البيريود:

دي من أكتر الأساطير المنتشرة، بس الحقيقي إن الخصوبة مابتكونش أقوى حاجة فيها في الوقت ده، لكن بتبقى الخصوبة في أقوى حالاتها من 12 لـ 16 يوم قبل البريود، لكن خليكي فاكرة إن مش كل الستات البيريود بتجيلها كل 21 يوم مش 28 يوم، والحيوانات المنوية ممكن تفضل في الجسم من 5 لـ 7 أيام.

9- البيريود بتعتمد على مرحلة القمر:

الأسطورة دي اتقالت في العصور القديمة ولحد دلوقتي الأبحاث ماتعرفش إيه العلاقة بين الاتنين، والسبب اللي مخلي الكلام ده أسطورة لحد دلوقتي إن الدورة القمرية بتستمر لمدة 29 يوم ونص لكن فترة البيريود بتكون من 21 يوم لـ 35 يوم وأوقات بتتغير طول حياة الست، ولو استمرت البيريود مع ميلاد القمر فهي مجرد صدفة.

10- من الخطر إنك تأجلي البيريود بحبوب منع الحمل:

تقريبا كل ست حاولت ولو مرة واحدة في حياتها إنها تأجل البيريود مرة واحدة بس، وفيه ستات كتير مابتستخدمش حبوب منع الحمل لإنهم بيعتبروا إنها ممكن تأثر على صحتهم، لكن الخبراء أثبتوا إن تأجيل البيريود مابيشكلش أي مشاكل على الصحة، وفي بعض الحالات بيكون ده مفيد وبينصح بيه الدكاترة خصوصا لما بتعاني من آلام الطمث.

Comments: