١٣ سببب يخلوا مسلسل "تشيرنوبيل" أحسن مسلسل في 2019 مش "جيم أوف ثرونز"

11/06/2019

الأسبوع اللي فات قناة HBO ذاعت الحلقة الخامسة والأخيرة من مسلسل "تشرنوبيل " وبقى متصنف أعلى مسلسل على IMDB، عشان كده هنقولك ليه هو مسلسل أحلى من "جيم أوف ثرونز" زي ما قال موقع Buzzfeed:

1- بالرغم من إن عدد حلقات المسلسل قليلين إلا إنه بيحكى قصة واقعية حصلت:

المسلسل بيتكلم عن اللي حصل في أوكرانيا في أبريل 1986 في محطة تشرنوبيل النووية، واللي اعتبرها العالم أسوأ كارثة نووية في التاريخ.

2- اتعمل عنه أبحاث كتير عشان يتأكدوا من صحة التفاصيل:

"كريج مازن" سيناريست المسلسل اشتغل على كل الموارد والمصادر واتكلم مع علماء عشان يعرف إزاي المفاعل النووي بيشتغل، وأبحاث المؤرخين وشهادات الناس وقتها اللي اتكتبت.

3- المسلسل في الأساس مسلسل رعب غير تقليدي:

مابيستخدمش الطريقة التقليدية في الرعب، بس فعلا المسلسل قادر إنه يخوفك خصوصا وإنت عارف إن الكلام ده حصل فعلا.

4- المسلسل برضه اتمسك بالدراما:

أحداث المسلسل فيها دراما كتير واتكلم برضه عن الخدع السياسية الجغرافية اللي حصلت في الوقت ده.

5- الطريقة اللي بيبني بيها المسلسل فيها تشويق حلو جدا:

التوتر وقت الكارثة كان موجود دايما، لكن على عكس المسلسلات الرعب مفيش استراحة من توتر الأحداث.

6- بصريا كمان المسلسل مليان إبداعات فنية:

فيه مشاهد كتير كان واضح فيها إصابات الناس من تأثيرات الإشعاع وده جزء كمان ممكن يحسسك بالرعب، كمان هدف المشاهد دي ماكنش عشان يرعب المشاهدين وتوضيح الدم بس، كان هدفها توصيل مشاهد الخوف والحزن اللي حس بيها الضحايا.

7- مفيش شخصية أساسية في المسلسل، واعتمد على توضيح وجهات النظر عن طريق عرض وجهات نظر لأكتر من شخص:

والنتيجة كانت إن المسلسل وضح إزاي الكارثة فعلا أثرت على مجموعة كبيرة من الناس من سياسين وعلماء وأشخاص عاديين مايعرفوش إيه اللي كان بيحصل.

8- وكل شخصية بيبقى ليها لحظة محورية:

كل شخصية بتظهر في حلقة واحدة أو حلقتين بالكتير، ممكن ماتفتكرش اسمهم بس هتفتكر سبب وجودهم وكان إيه دورهم في الأحداث.

9- مش هيكون عندك شخصية مفضلة في المسلسل:

الموضوع مش متعلق بإن يبقى عندك شخصية مفضلة في المسلسل، ومش هتقول على شخص سيء برضه، لكن الحاجة المقنعة أكتر هي قصة المسلسل نفسه.

10- وبالرغم من إن المسلسل بيتكلم على حدث حصل في إبريل 1986 إلا إنك هتحس إن الأحداث ليها صلة بـ 2019:

الطريقة اللي اتعاملت بيها الحكومة مع الحادثة وإزاي غطت على الأحداث وقتها.

11- المسلسل تعليمي جدا:

المسلسل مدروس جدا بشكل يخليك تحس في الأخر إنك اتعلمت كتير عن الفيزيا والإشعاع.

12- وطبعا أداء الممثلين كان عالمي:

خليك فاكر إن المسلسل ده هيأخد جوايز كتير الموسم ده.

13- وفي الأخر عدد الحلقات قليل جدا لدرجة إنك تقدر تتفرج عليه في ويك-إند:

لو كنت من الأشخاص اللي مابيحبوش يقعدوا كتير يتفرجوا على حاجة، فمسلسل "تشرنوبيل" هو المسلسل اللي وقته مثالي عشان تتفرج عليه.

Comments: