أكتر 10 أماكن مخيفة في العالم: مقبرة فيها بقايا 6 مليون متوفي

11/06/2019

محبين السفر والمغامرة عندهم شغف دايما بأي مكان جديد ممكن يسافروا ليه، بعضهم بيحب المغامرة ومعندوش مشاكل يروح مكان يبدو مخيف أو غريب عشان ياخد فيه صور ويحكي عن غرابة المكان ويزود قايمة مغامراته، لكن الأماكن اللي جاية -واللي رصدها موقع List25، مفيش بني آدم طبيعي عاقل راشد بالغ هيحب يروحها، لأنها أكتر أماكن مخيفة في العالم:

1- بحيرة النطرون - تنزانيا

في شمال تنزانيا، بحيرة النطرون بتتكون من الملح وكربونات الصوديوم، معروفة بارتفاع درجة حرارتها المياه فيها واللي بتوصل لـ 60 درجة مئوية، ومع الملح بتتسبب في تدمير جلد أي كائن حي يلمسها وموته كمان، ماعدا بعض الحيوانات اللي قدرت تتكيف مع الأجواء دي، ده غير إن النسبة الكبيرة من كربونات الصوديوم بتحفظ الأجساد الميتة فبتتحول لمومياوات بالمعنى الحرفي.

2-  مقبرة باريس - فرنسا

مقبرة باريس الضخمة بيطلق عليها "إمبراطورية الموتى"، وهي أضخم وأكتر مقبرة مخيفة في العالم بتمتد لأكتر من 320 كيلو متر (قد المسافة من القاهرة لإسكندرية تقريبا)، بعض التقديرات بتقول إن المقبرة شايلة بقايا أكتر من 6 مليون متوفي، وبسبب تشعبها وطولها الكبير، ناس كتير فُقدت جواها وماتت.

3- معسكر اعتقال أوشفيتز - بولندا

في جنوب بولندا، موجود معسكر اعتقال نازي قديم مات فيه أكتر من مليون سجين أغلبهم من اليهود اللي ماتوا من الجوع والعمل بالسخرة والأمراض المعدية أو التجارب الطبية.

4- متحف فيروليك - هولندا

في عاصمة هولندا، وداخل جامعة أمستردام، موجود متحف فيروليك اللي اتسمى على اسم عالم التشريح الهولندي ويليام فيروليك، المرعب في المتحف إنه مليان عدد كبير ومتنوع من أجزاء من الأجسام البشرية اللي بتشرح حاجات كتير في علم التشريح والتشوهات الخلقية.

5- مقبرة تشوتشيلا - بيرو

على بعد 30 كيلومتر جنوب مدينة نازكا في بيرو، مقابر تشوتشيلا اللي بتجمع بقايا أجساد بشرية من عصور قديمة واحدة من أكتر الأماكن المخيفة في العالم، لأن الجو الجاف خلى الأجسام اللي اتدفنت وهي ملفوفة بملابس قطنية، تحتفظ بالملابس على الهياكل.

6- بريبيات - أوكرانيا

مدينة بريبيات في شمال أوكرانيا، هي المكان اللي شهد كارثة انفجار مفاعل تشيرنوبل النووي في أبريل 1986، وهي أسوأ حادثة نووية حصلت في التاريخ البشري، حصدت أرواح عدد كبير من البشر، وسببت ملايين التشوهات والأمراض لملايين البشر.

7- فندق "ستانلي" - أمريكا

في ولاية كلورادو الأمريكية، موجود فندق "ستانلي" المسكون بالأرواح، واللي ألهم الكاتب الأمريكي العظيم ستيفن كينج إنه يكتب روايته المشهورة اللي اتحولت فيما بعد لفيلم من إخراج ستانلي كوبريك اسمه The Shining، ستيفن كينج أقام في الفندق بالفعل ورصد الغموض اللي بيحصل فيه بنفسه.

8- باب الجحيم - تركمانستان
 

حقل غاز طبيعي في تركمانستان أطلق عليه العلماء اسم "باب الجحيم" لأنه تحول لكهف تحت الأرض سنة 1971 عشان كده بقى دايما مشتعل بالنار، وبقى أشبه بفوهة بركان.

9- جزيرة التعابين - البرازيل
 

على ساحل مدينة ساو باولو البرازيلية، جزيرة التعابين بتضم أكتر من 4 آلاف تعبان، من ضمنها أنواع شديدة الشراسة عندها القدرة على إنها "تدوب" الجلد البشري.

10- سوق الجماجم والأصنام - توجو

في العاصمة التوجولية "لوم"، في سوق مخصص للأصنام والشعوذة بتتباع فيه رؤس حيوانات زي الفهود، وبتتاع فيه كمان جماجم بشرية، واللي بيشتروها بيعتقدوا إنها بتحمي من الشرور أو بتستخدم في علاج بعض الأمراض، التمشية في السوق ده مرعبة لأقصى درجة.

 

Comments: