تريلر الفيل الأزرق: 5 حاجات خطفت الجمهور قبل ما يتفرج

12/06/2019

سنة 2012 نشرت دار الشروق رواية اسمها الفيل الأزرق للكاتب أحمد مراد، الرواية انتشرت جدا وأغلب الناس فعلا قريتها واتبسطوا منها جدا خصوصا وبدأوا يرشحوها لصحابهم ولمعارفهم، وبعدها بفترة ظهرت أخبار إن الرواية هتتحول لفيلم، وفعلا اتحولت لفيلم في 2014 من إخراج مروان حامد وبطولة كريم عبد العزيز ونيلي كريم وخالد الصاوي.

فيلم الفيل الأزرق فيلم إثارة ورعب وفيه قصة مبتكرة وده كان السبب اللي خلى الفيلم اتقيم على الموقع العالمي IMDB بـ 8.2، والفيلم نال إعجاب أغلب اللي اتفرجوا عليه، وعشان كده الجزء التاني منه0هينزل السينمات في عيد الأضحى اللي جاي، ونزل امبارح "تريلر" الفيلم على السوشيال ميديا واللي كان واضح إنه عجب مستخدمين السوشيال ميديا جدا.

ظهر في "التريلر" كريم عيد العزيز ونيلي كريم أبطال الجزء الأول، وهند صبري وإياد نصار كمان هيكونوا من أبطال الجزء التاني، وواضح برضه من "التريلر" إن فيه مجموعة من "إنفلونسرز" السوشيال ميديا هيشاركوا في العمل زي مراون يونس وتامر هاشم (درامرز فرقة كايروكي) وتارا عماد وأسما شريف منير.

هند صبري ونيلي كريم ظهروا بأدوار شخصيات بتعاني من أمراض عقلية أو نفسية، وواضح كمان إن نيلي كريم هتعوضنا عن دراما ونكد مسلسلات رمضان اللي حرمتنا منه السنة دي لكن المرة هتنكد علينا وتخلينا نعيط عشان معانتها مع مرض عقلي حاد وكان ده واضح في لقطات كتير، وخلينا كمان ماننساش إن هند صبري واضح من "التريلر" إن أداها مظبوط جدا، وقالت جملة استخدمتها صفحة مروان حامد هاشتاج وهي "لا تخافوا لكن احذروا"

واضح كمان إن فيه مؤثرات بصرية ورحلة تانية دكتور يحيى هيروح فيها في زمن تاني بسبب تأثير حباية الفيل الأزرق، ده غير إن الموسيقي التصويرية لهشام نزيه وهي مزيكا قادرة تخطفك وتتفرج على التريلر تاني عشان تسمعها، الإعلان التشويقي للفيلم بس على السوشيال ميديا في أقل من 24 ساعة داخل على الـ 4 مليون مشاهدة، وداخل على الـ 10 ألاف شير، ومن الواضح إنه هيكون من أهم الأفلام في سنة 2019 في السينما المصرية وهيعمل إيرادات خرافية.

Comments: