١٠ حقايق قاسية كلنا بنتجاهلها: إنت مش محور الكون.. ومعاناتك هي اختيارك

14/06/2019

الطفولة وقت مهم فيه تفاصيل كتيرة بتبان مميزاتها مع مرحلة النضج، ويمكن اللي بيختلف بين المرحلتين إن في الطفولة الشخص بيكون أضعف ومستني الاهتمام والرعاية من الآخرين، ولما بنكبر بنحط لنفسنا شوية قواعد جديدة وبنفهم مع الوقت إن محدش مهتم بينا أكتر من نفسنا، مفيش حد بيفضل دايما موجود ومفيش حد هيفضل يشجعك على كل نجاح، ومفيش حد هيفضل يديك كتفه تعيط عليه كل ما تبقى حزين، وإن فيه دايما أشخاص أحلى وأذكى منك، عشان كده جمعنالك شوية حاجات صادمة ممكن تكون بتتجاهلها في حياة النضج، واللي نشرها موقع Brightside.

1- مفيش فايدة من التضحية عشان الناس:

عمرك قولت لحد "أنا عملت كل ده عشانك" ورد عليك بعد كده وقالك "هو حد كان طلب منك تعمل حاجة أصلا!"، خلينا صرحا أكتر، الناس اللي حوالينا مش محتاجين إننا نضحي عشانهم وفي معظم الوقت هيعتبروا إن ده اقتحام لحياتهم.

2- مفيش حد مننا هياخد ميدالية في الشغل:

هيتقال عنك إنك أشطر واحد في الشغل قد ما هيتقال، بس للأسف إنت مش هتبقى صاحب الشغل بل بالعكس، صاحب الشغل وزملاء العمل هيدوك شغلهم تعمله، وفي حين ما إنت حياتك الاجتماعية مقتولة ومطحون في الشغل هتلاقيهم مرتاحين وبيشربوا قهوة وبينزلوا صور على السوشيال ميديا، لكن إنت متوقع من مديرك إنه هيمدح فيك زي ما كان بيعمل مدرسينك في المدرسة وإنت صغير.

3- مشاكل المظهر:

ممكن تتكلم عن جمال الروح والقلب وتقول إن الحلاوة حلاوة الروح كتير، بس اللي بيحصل فعليا إن الناس بتهتم بالمظهر الخارجي وبتحكم على الكتاب من عنوانه ومن غلافه عادي جدا، حتى في الإنترفيو الموضوع مابيكونش على أساس الخبرات الشخصية بس كمان بيبقى على أساس المظهر ومهارات التواصل مع الناس.

4- إنك تبقى شخص كويس دي مش مهنة:

محدش هيعاملك في الشغل كويس مثلا عشان سواد عيونك أو عشان عندك 3 عيال أو عشان عندك ظروف في حياتك أو عشان مامتك تعبانة، المديرين دايما مهتمين بجودة الشغل، لو كنت مابتدخلش فلوس للشركة فخليك عارف إن هيتم استبدالك بشخص تاني نشيط أكتر.

5- ماما مش دايما صح:

مع الوقت هنبطل نعمل زي ما أهلنا بيعملوا بالظبط، وهنبطل نقلدهم التقليد الأعمى، والأفكار هتتغير وهنعرف إن أهلنا هما أشخاص عاديين عندهم عيوب وعادات سيئة وأفكار مش لازم تكون دايما صح، وممكن كمان الأخطاء اللي عملوها تبقى في تربيتك، آه ده ممكن يبقى شيء حزين بس قريب أو بعيد يعني عيالك إنت كمان هيبقى عندهم خيبة أمل فيك إنت كمان.

6- هتفضل تتعلم لحد سن المعاش أو بعد كده كمان:

التكنولوجيا بتتطور بطريقة مخيفة، عشان كده ممكن وظيفتك تختفى كمان 10 أو 15 سنة، وده معناه إنك لازم دايما تتعلم حاجة جديدة وتزود مؤهلاتك عشان تبقى متخصص في شغلك.

7- لو فضلت ماتحضرش مناسبات محدش هيعزمك تاني:

خدعة إنك تتمرع وتتقمص وتستنى الناس تكلمك تاني عشان يتحايلوا عليك تروح معاهم دي كانت بتحصل وإنت في المدرسة، محدش مهتم بالكلام ده وإنت كبير، وبعد كده صحابك هيفتكروك مش عايز تتواصل معاهم تاني والتواصل بينكوا هيضيع.

8- إنت مش محور الكون للأسف:

دفعت قبل كده نص مرتبك في طقم جديد ومحدش خد باله منه أصلا؟ ماتضايقش وحاول وقتها تفتكر آخر مرة كنت مبسوط لصاحبك إنه جاب هدوم جديدة، والأخبار السعيدة بقى إن محدش هيلاحظ إن شرابك مقطوع أو فيه اخرام.

9- اللي إنت فيه دلوقتي ده اختيارك الشخصي:

الشخص الوحيد المسؤول عن أفعالك هو إنت، لو مابتعرفش تتكلم إنجليزي فالسبب إنك ماتعلمتهوش، لو مديرك بيقولك كلام يسم بدنك في الشغل فالسبب هو إن أفعالك كانت السبب في ده، محدش له ذنب إنك مادخلتش الكلية اللي كنت عايزها وإنك ماتجوزتش الشغل اللي بتحبه.

10- دايما فيه شخص أحلى وأذكى وأصغر وأفضل منك:

من أهم الحاجات اللي هتخليك تحترم نفسك، إنك هتدرك إن فيه شخص أفضل منك في العالم ده، ممكن تحتفل كل سنة بعيد ميلادك الـ 21 بس خليكي فاكرة إنك بتكبري وتجاعيد وشك هتكتر وبالنسبة للرجالة فهيعانوا من الصلع وهيطلعلهم كرش.

كل اللي عليك إنك تعرفه إنك تقبل نفسك زي ما إنت بعيوبك وتتقبل وتدرك إن فيه أشخاص أفضل منك وإن كل شخص فريد ومميز في حاجة معينة وبطريقته الخاصة.

Comments: