٩ مصريين في قايمة "فوربس" للشباب العرب المبدعين تحت سن التلاتين

14/06/2019

مجلة "فوربس" العالمية، أصدرت قوايم سنة 2019، واللي من ضمنها قايمة "30 Arab under"، واللي ضمت أعم 30 شخصية من الشرق الأوسط تحت 30 سنة، سواء كانت الشخصيات دي عايشة في الشرق الأوسط وليها أصول أجنبية، أو أصلها من الشرق الأوسط وعايشة في بلاد أجنبية.

وعموما، مصر سيطرت على القايمة دي بـ 9 شخصيات و7 تجارب، بينهم رواد أعمال ورياضيين، "فوربس" قالت إن منطقة الشرق الأوسط بيزيد فيها نسبة الشباب عن الأعمار التانية بشكل ملحوظ، وإن إدارات الدول بتحاول تستثمر في قدرات ومواهب الشباب، وده اللي ساهم بالفعل في ظهور ابتكارات عظيمة في التكنولوجيا وإنجازات حقيقية في البيزنس.

أما عن طريقة اختيار الشخصيات، قالت المجلة إنها اختارت الشخصيات الأكثر حصولا على الجوايز، والأكثر تاُثيرا وتغييرا في مجالاتهم، واللي أحدثوا فرق واضح في الصناعة أو المجال بتاعم، واللي حظوا باهتمام إعلامي كبير سواء الإعلام التقليدي أو على السوشيال ميديا، ودي قايمة المصريين اللي شرفونا في "ليستة فوربس".

1- آية وموناز عبدالرؤوف
 

الأختين اللي عندهم على التوالي 27 و28 سنة، واتخرجوا من الجامعة الأمريكية في القاهرة، حققوا نجاح وشهرة كبيرة من خلال تأسيسهم براند "Okhtein" للأزياء، واللي في وقت قليل حقق نجاح عالمي لدرجة إن نجوم زي "بيونسيه" و"جيجي حديد" استخدموا شنط من علامتهم التجارية.

مبيعات "أختين" اتضاعفت سنة 2017 بنسبة 476% أكتر من السنة اللي قبلها، وباعوا أكتر من 3 آلاف حقيبة بنسبة سيطرة على السوق العالمي وصلت لـ 34%، أما عن التصميم فـ"آية" و"موناز" استلهموا العمارة القاهرية فحولوا التراث لقطع فنية محمولة، وبدأوا مشروعهم برأس مال 5 آلاف دولار وحولوا مكتب والدهم لورشة صغيرة، واستعانوا بأحد عمال الحرف اليدوية في تنفيذ المشروع.

2- مايكل فريد
 

المهووس بالتكنولوجيا وصاحب الـ 27 سنة، خريج معهد ماساتشوستش للتكنولوجيا، أسس مع زمايله كيل روجرز ولوك شلوتر وبرادي نايت، مطعم Spyce، وهو مطعم وسريع في بوسطن، الروبوتات هي اللي شغاله في مطبخه ويتنضف كمان، والمطعم بيقدم وجبات منخفضة التكلفة زي الرز والفراخ والخضروات بسعر 7.5 دولار للطبق.

3- نجيب ساويرس
 

ابن أخو رجل الأعمال الشهير نجيب ساويرس، والمقيم في سان فرانسيسكو، كاليفورنيا وعنده 26 سنة، أسس موقع وتطبيق Yup واللي بيقدم محتوى تعليمي للطلبة في العالم كله على مدار الساعة، من خلال مدرسين متعاونين مع التطبيق اللي بيخدم حاليا أكتر من 730 ألف طالب.

4- عمر جابر ومعتز سليمان
 

الشابين اللي عندهم دلوقتي 28 سنة، أسسوا Instabug لما كانوا طلبة في جامعةا لقاهرة، واللي بيقدر يكتشف ويحلل ويعالج أعطال تطبيقات الموبايلات سواء "أندرويد" أو IOS، عن طريق رسوم شهرية بيدفعها صاحب التطبيق، الشركة نجحت وكبرت لدرجة إن من ضمن عملائها حاليا، Yahoo و PayPal و"هيلتون" و"سوق.كوم".

المبهر، إن  Instabug حاليا بيقدر يرصد ويحلل أكتر من 50 ألف خلل في تطبيقات مختلفة يوميا، وشغال على 12 ألف تطبيق متعاقد معاهم.

5- نور الشربيني

لاعبة نادي الإسكندرية الرياضي، وبطلة العالم في الاسكواش، ومتصدرة الترتيب العالمي أبهرت العالم كله بالأداء اللي قدمته في كل بطولة اشتركت فيها، واللي حققت من احترافها الاسكواش وبطولاتها العالمية 147 ألف دولار حتى الآن، نور تربعت على عرش الاسكواش في العالم وهي بنت الـ 23 سنة، ده غير إنها أصغر لاعبة تاخد بطولة العالم تحت 19 سنة، وحققتها وهي عندها 13 سنة بس!.

6- محمد الشوربجي

عنده 28 سنة، وهو أهم لاعب اسكواش في العالم، حقق أرقام قياسية كتيرة، وفاز خلال مشواره بـ 35 لقب دولي، واحتفظ بصدارة الترتيب العالمي في الاسكواش لـ 40 شهر متتالي، وده رقم قياسي غير مسبوق، 

7- محمد صلاح

أو في قول آخر، ابننا، فخر العرب "صلاح" في 2017 و2018 ومن ساعة ما انضم لليفربول، بقى واحد من أهم وأغلى 5 لاعيبة في العالم، الأداء المبهر اللي قدمه مع "الريدز" وتحقيقه لقب هداف الدوري الإنجليزي سنتين ورا بعض، والفوز بدوري أبطال أوروبا، وتحقيق ألقاب فردية كتيرة منها أفضل لاعب في أفريقيا، وأفضل لاعب من BBC، وجايزة "بوشكاش" لأحسن هدف في العالم، كل ده أهله إنه يكون موجود في قايمة الشباب العرب أصحاب المواهب، والأقل من 30 سنة.

Comments: