إزاي مشاعرك ممكن تدمر صحتك الجسدية: الخوف بيسبب الحساسية والتهاب الجلد

16/06/2019

أوقات كتير ممكن مانكش عارفين أو مركزين إحنا حاسين بإيه بالظبط، لكن لو ركزنا مع رد فعل جسمنا هنعرف نلقط مشاعرنا ونفهمها، لإن في الأغلب جسمنا بيتكلم وله رد فعل على مشاعرنا وانفعالاتنا، ومن المعروف إن التعب النفسي بيتحول لتعب جسدي وخصوصا عند الناس اللي مابيقدروش يعبروا عن مشاعرهم كويس، وأكيد - ولو مرة - حصلت لكل واحد فينا وتعب ولما راح لدكتور كان تفسير الدكتور لحالته أو لمرضه إن دي حالة نفسية.

عشان كده خلينا نقولك على شوية أعراض جسدية بتدل على مشاعر سلبية عندك:

1- الخوف بيسبب الحساسية والتهاب الجلد:

فيه باحثين بيقولوا إن بعض أمراض الحساسية ليها علاقة بالصحة العقلية، زي الأكزيما والحمى والربو، ممكن يبقى عندك حساسية من سنين لسبب غير معروف، لكن الخوف ممكن يبقى السبب فيها، وممكن العلاج يبقى تقليل الضغوطات النفسية اللي على الشخص.

2- الهواجس ممكن تبقى السبب في مشاكل الوزن:

ممكن مشاكل الهوس أو إن الشخص يبقى منشغل بعيب صغير أو وهمي حتى، يسبب مشاكل الوزن، فممكن يبقى الشخص شاغل نفسه جدا بالتجاعيد أو إن فيه أجزاء في جسمه مش عاجباه سواء كان حجمها كبير أو صغير بالنسبة له، طبعا إن الشخص يهتم بجسمه دي حاجة مهمة وأكيد كلنا لازم نهتم بجسمنا، لكن التعصب بيوصل لنتايج غير مرغوب فيها وأوقات بتبقى خطر.

3- الخوف والإيحاءات ممكن يسببوا أمراض كتيرة في نفس الوقت:

ممكن الشخص يبدأ يقلق إنه بيعاني من مرض خطير بس في الحقيقة مفيش أي أساس للصحة من الكلام ده، لكن بعد ما تفكر شوية وتركز، هتحس بالأعراض في جسمك، الهوس أو الايحاء ممكن يسبب ده، وفي أوقات ممكن نبالغ في تقدير المشاكل، التركيز على المشاعر السلبية وتوهم المرض هيخلينا نحس بأعراض الإعياء فعلا.

4- الاضطرابات العاطفية والضغوطات ممكن تسبب أمراض الجهاز الهضمي:

جهازنا الهضمي وبالأخص معدتنا، نظامها معقد جدا، ممكن ضغوطات ومشاكل الحياة تسبب التهاب في المعدة، اللي ممكن ييجي كمان بسبب صراع في مشاعرك أو مشاكل زي عدم قدرة الشخص على تحمل المسؤولية، والنضج، وعدم القدرة على إن الشخص يلاقي مخرج من المشاكل والصراعات، ده غير القولون العصبي طبعا اللي معروف ارتباطه بالحالة المزاجية.

5- انتقاد الذات والخوف ممكن يسببوا الصداع والصداع النصفي:

انتقاد الذات وقلة احترام النفس والمخاوف الداخلية والقلق كلها أسباب ممكن تسبب الصداع طول الوقت، ممكن تحس بالإهانة أو التقليل من نفسك لحد كبير وممكن يبقى صعب تسامح نفسك من كتر جلد الذات وده بيخلي فيه ضغط كبير أوي على دماغك، وساعات ممكن نتوقع حاجات أحسن من نفسنا ونحس بإحباط، وده اللي بيخلي الشخص يدخل في مشاكل جسدية زي الصداع مثلا.

6- الاكتئاب والقلق ممكن يسببوا أمراض القلب:

القلق والاكتئاب بيرتبطوا بأمراض القلب التاجية، وممكن النوبات الاكتئابية تسبب حالات خطيرة، وممكن تحس بالقلق والعصبية يوم بعد يوم وده ممكن يسبب إن قلبك هيدق أسرع واللي بيسبب في الأخر مشاكل في القلب.

وعشان تتخلص من الأعراض دي زي ما بتزور دكتور، ممكن كمان كمان تروح لدكتور نفسي عشان تتطمن على حالتك النفسية وتحط حلول جذرية لأي مشكلة منهم مهما، "الـ Meditation" وتمارين اليقظة حل كويس جدا على تقليل التوتر، والخبراء كمان بيقولوا إن تمارين اليقظة "Mindfulness"  بتساعد الشخص إنه يتعلم يركز كويس وإنك ماتحكمش على نفسك وعلى الناس وإنك تبطل وتشتت تفكير في بعض الأوقات.


 

Comments: