٦ علامات تعرف منهم إن عندك Daddy Issues

16/06/2019


فيه مصطلح قاله فرويد اسمه "عقدة الأب"، مفكرين وعلماء نفس اشتغلوا عليه من بعده عشان يشرحوا إنه اضطراب بيكون في العلاقة بين الشخص وأبوه، وبالنسبة للبنات بالأخص اللي بيعانوا من "دادي إيشوز" بيتشدوا للشخص اللي بيعاني من عيوب زي اللي عند وده لإنهم بيحسوا بالأمان تجاه الأشخاص دول، في حين إن العلاقة بتبقى غير صحية وغير مريحة.

عشان كده فيه 6 علامات تقولك إنك بتعاني من الـ "دادي إيشوز":

1- هتدخل في علاقة مع شخص مش على نفس مستواك العاطفي:

من غير وعي هتدخل في علاقة مع شخص مش على نفسك مستواك العاطفي (بيحب بدرجة أقل) وده عشان تحمي نفسك، وغالبا حتى لو دخلت علاقة حقيقية ده مش هيدوم وقت كتير، وبتنجذب للأشخاص اللي مش مؤمنين بالرومانسية والحب والعاطفة.

2- علاقتك مع أهلك علاقة أحبك أكرهك:

دايما علاقتك مع أهلك بتلعب دور مهم جدا، خصوصا أبوك، وغالبا هو سابك وإنت صغير، ممكن يبقى مات أو سافر وممكن ماكنش عايش معاكم وممكن كان بيؤذي أمك وأخواتك وإنتوا صغيرين، وممكن بينتقدك دايما وممكن مش قابلك زي ما إنت وبيخليك تحس إنك مش كفاية، لكن للأسف مش هتختفي الـ"دادي إيشوز" لو ماشتغلتش عليها.

3- إنت بتخاف من الالتزامات:

بتتجنب الالتزامات مهما كان التمن، وبالذات لو الأمور كانت بشكل جاد مع شخص ما، ومابتسمحش لنفسك إنك تتكلم كتير عن نفسك عشان ماتخليش حد يقرب منك ومحدش يعرفك كويس، وبتفضل إنك تنهي علاقتك بشخص أحسن ما تتكلم معاه وتعرفه مشاعرك من ناحيته، ودايما هتلاقي نفسك بتدور على الأعذار بدل الحلول.

4- عندك مشاكل ثقة:

غالبا إنت اتأذيت بسبب وعود أبوك اللي كانت مابتتنفذش وخيانته، عشان كده بتبطل تحط سقف لطموحاتك وبيبقى عندك أزمة في الثقة إن الناس عايزين مصلحتك، وبدل ما تحكي أي حاجة تخصك من الماضي أو طموحات المستقبل بتسكت.

5- بتستثمر في الناس بزيادة:

الأشخاص اللي بيعانوا من الـ"دادي إيشوز" بيحسوا إنهم مش كويسين كفاية، عشان كده بيبذلوا مجهود زيادة عشان يلاقوا الحب والاهتمام والقبول، بيعتقدوا إنهم كل ما هيدوا الشخص كل ما هياخدوا منه مشاعر أو ما شبه أكتر، وغالبا هما الأشخاص اللي بيقدموا تنازلات أكتر.

6- بتبوظ علاقاتك الصحية:

نفسك تدخل علاقة وتعيش حالة حب لكنك خايف عشان بتفقد السيطرة، أول ما بتلاقي نفسك بتحب الشخص اللي معاك في العلاقة بيصيبك القلق والتوتر أحسن تسيبوا بعض أو يتم رفضك، عشان كده بتبقى عايز تبوظ إنت العلاقة قبل ما هو يبوظها وبتركز على عيوب الشخص بدل ما تركز على اللي بيعمله في العلاقة وإنت اللي بتبعد شريكك عشان كده بيسيبك، ولو ماعملش كده فإنت بتأذيه عن عمد وبتبقى عارف إنك بتدمر العلاقة عشان كده مابيكونش عندك فرصه حقيقية في حب شريكك.

 

Comments: