عبثيات: 15 خطوة هتخليكي تعرفي تتعاملي مع "إكس" شريكك

17/06/2019

في ثقافتنا بيبقى صعب جدا الشخص يتعامل مع "الإكس" بتاعه خصوصا لو ماتخطاش العلاقة دي، بس لو تخطاها وسامحوا بعض وكل واحد خد طريق تاني ممكن يتعاملوا مع بعض كاجوال جدا، بس فيه مشكلة واحدة بس ممكن تقابلك لو بتتعامل لسه مع "الإكس" بتاعك، هي إن شريكك الحالى (أيا كان نوع العلاقة بينكوا متصاحبين ولا مخطوبين ولا متجوزين) ممكن يتضايق عشان أكيد هيغير، لكن فيه ناس قادرة تثبت العكس وتقولنا إن الدنيا لسه بخير زي دينا الشربيني مثلا، اللي انتشرت صورة ليها مع شيرين رضا وهي "إكس" عمرو دياب.

فلو عايزة تتعاملي مع إكس شريكك خلينا نقولك المفروض تعملي إيه:

1- ابدأي الأول اتناقشي مع شريكك عن إكساته في المطلق، وبلاش تخلي المناقشة حادة ولا قالبة على قفش وخناق اتكلمي عادي واسأليه هي مين؟ وفضلتوا مع بعض قد إيه؟ وسبتوا بعض ليه وإزاي؟ حبتها؟ عيطت لما سبتوا بعض؟ لسه بتشوفها؟ افتحي له تحقيق يعني مش محتاجين نوصيكي.

2- دوري على الأكونت بتاعها على السوشيال ميديا و"استوكيها"، ودوري كويس لو فيه أصدقاء مشتركين بينكوا، وشوفتي بقى التحقيق اللي فتحتيه مع شريكك ده افتحيه مع صحابكوا المشتركين كمان.

3- طبعا أول ما هتفتحي السوشيال ميديا بتاعتها تلقائي جدا هتدخلي على صورها وتشوفي إذا كانت حلوة ولا لا، وهتشوفي لو كان شريكك بيكتبلها "كومينتس" أو أي حاجة وهتركزي فيهم.. إنت كده ماشيه صح كملي.

4- اتكلمي مع صحابك عنها ووريهم صورها، وده الوقت اللي بيظهر فيه معدن الصداقة الحقيقي عشان أكيد هيقولولك إنك أحلى منها أو إنك أروش أو دمك أخف.

5- وطبعا ماتسامحيش أي حد يقولك هي مش غلطانة هي عملت إيه يعني! شياطين دول ولا إيه؟!

6- الفضول مش هيسيبك في حالك و"هتستوكي" إنستجرام بتاعها لحد 2012، حاسبي أحسن تعملي لايك بالغلط عشان وقتها هتتمني الأرض تنشق وتبلعك.

7- ممكن تتحايلي على شريكك أو تدحلبي له بأي شكل من الأشكال وتقري "الكونفرزيشنز" اللي بينهم على الفيسبوك، أكيد هيتضايق شوية بس معلش ابقي صالحيه بعدين، المهم إن خليكي فاكرة الكلام كويس جدا عشان هتقعدي مع واحدة من صحابك وتفكوا شفرات "الكونفرزيشن" دي.

8- هاتي سيرتها في الكلام كل شوية قدام شريكك عشان تشوفي رد فعله على سيرتها وركزي مع ملامح وشه.

9- قارني نفسك بيها عن طريق الأسئلة لشريكك وصحابه وعيلته لو متاح، يعني أسأليهم مين بيعمل أكل أحلى؟ مين بيعرف يظبط خروجات ليكوا أحسن وخلى دايما المقارنة تبقى في صالحك.

10- اسألي شريكك وقت ما يكون مش واعي (نايم مثلا أو أي حالات تانية) حبيت مين فينا أكتر، واصحي الصبح اتعاملي مع الموقف بقى.

11- اتعاملي عادي جدا لما حد يقول اسمها ولا كأن عندك أي مشاعر من ناحيتها، اسالي اللي ذكر اسمها تقصد مين؟ وبعدين اعملي نفسك افتكرتيها.

12- ماتنسيش لو شوفتيها مع شريكك إنك تمسكي إيده مثلا أو تبيني أي مظاهر حب (حتى لو مش طايقين بعض)

13- بعد كل اللي عملتيه ده ممكن تعرضي عليها إنكوا تبقوا صحاب.

14- خليكي عارفة إن إنتي كمان احتمال تبقى "إكس" واحد تاني وشريكته دلوقتي بتعمل كل اللي بتعمليه مع "إكس" شريكك.

15- دلوقتي كده نحب نقولك مبروك إنتي كده مابقتيش زي دينا الشربيني وشيرين رضا، إنت بقيتي زي سمية الخشاب وريم البارودي.

Comments: