١٤ مقلب وقعت فيهم من وإنت صغير لحد دلوقتي

18/06/2019

من وقت ما كنا أطفال وكانوا بيقولولنا "بص العصفورة" فتبص على العصفورة فعلا وماتلاقيش حاجة لحد دلوقتي وإنت بتتخدع، الحياة مليانة بالخدع، ومش لازم كمان تكون الخدع واضحة زي خدعة بص العصفورة ولا بالمفعول القصير ده، فيه خدع أصلا إنت دخلتها وماعرفتش تخرج منها.

عشان كده خلينا نقولك أشهر 14 خدعة أضحك عليك بيهم:

1- انك تدوس على "سبيس" وإنت بتتفرج على فيديو على "اليوتيوب"

دوس على حرف "K" بداله.

2- أول ما تبص لبياع في أي مكان وتعمل معاه "Eye contact":

5 دقايق بعد كده وهتشتري أي حاجة وإنت مش واخد بالك.

3- بتعتقد إنك مابتتأثرش بالتسويق:

التسويق والماركتينج مش مجرد إعلانات على التلفزيون أو السوشيال ميديا، هو بيحصل بطريقة متخفية إنت مش متخيلها، حتى رص المنتجات في السوبر ماركت بيتم تصميه مخصوص عشان يأثر على راحتك وحركتك.

4- لازم تنهى تعليمك الجامعي:

فيه ناس كتير بقى معاها فلوس واشتغلت كويس من غير ما يكملوا تعليمهم.

5- إيه اللي على التي شيرت بتاعك ده؟

هيخهيخوهيخوو "بص الحمار مالقاش حاجة لقى الجاموسة في التلاجة".

6- مناديل الحمام اللي بتخلص:

بعد ما تخلص وخلاص جاي تطلع منديل تلاقي المناديل خلصت.

7- زرار Download:

هتندم أكيد بعد ما تدوس على أكبر وأول زارا Download يقابلك في المواقع.

8- اللي إيده قد وشة هيدخل الجنة:

أكيد وإنت صغير في المدرسة حد عمل فيك المقلب ده عشان كده إنت عملته في حد تاني.

9- شحن اللاب توب يفصل قبل ما تعمل save:

هتشتغل كتير ومن كتر الشغل هتنسى تعمل save ومن كتر الشغل برضه هتنسى إن تحط الشاحن، وغالبا الحركة دي كانت بتحصل في الكمبيوتر العادي أكتر.

10- هتحاول ترضي كل الناس:

كل ما هتكبر في السن كل ما هتعرف إن مفيش مفر ولا مهرب من انتقاد الناس ليك مهما حاولت ترضيهم، ولو عملت كل حاجة ترضيهم هيحسسوك إنك مأثر في حق العالم.

11- الحلقات المفرغة:

نفسك يبقى عندك بيت أكبر فهتدور على شغل أحسن وهتجيب البيت الأحسن، فهيبقى نفسك في حاجات أحسن وأكتر تاني فهتدور على شغل أحسن تاني وهكذا من الدايرة المفرغة اللي مابتخلصش.

12- هتستخدم الـ"كرديت كارد" عشان تاخد جايزة:

فاكر اللي قولناه عن الماركتينج والتسويق فوق انت وقعت فيه اهو

13- تفتكر إنك شوفت الشخص ده قبل كده:

تبقى رايح تسلم على حد كده في وسط الشارع أو تنادي عليه أصلا بس أول ما بتركز شوية بتكتشف إنك ماتعرفهوش أصلا ومش هو اللي كنت بتشبه عليه.

14- برنامج رامز جلال:

أكيد جيه عليك فترة واتخدعت إنه حقيقي وإن المقالب دي بجد وكده.
 

Comments: