كل اللي محتاج تعرفه عن العملة الإلكترونية اللي هيعملها "فيس بوك": هتدفع بيها أونلاين

18/06/2019

الفيسبوك كشف عن خطته لإطلاق عملة جديدة مشفرة عشان يتم التعامل بيها على مواقع التواصل الاجتماعي والدفع الإلكتروني واللي بيتمنوا إنها تكون زي الدولار الأمريكي كده، وهتتسمى "ليبرا" وهيتم إطلاقها في أقرب وقت السنة الجاية وهتكون عملة رقمية مشفرة بعوامل أمان عالية، بتدعمها عملات وأوراق مالية مدعومة من الحكومة، وأعلن عن منظمة غير هادفة للربح اسمها "ليبرا" هتقوم بمشاركة 27 دول حول العالم.

الهدف من العملة دي هو تجنب التقلبات في قيمة العملات ويبقى استخدام الـ"ليبرا" في المعاملات اليومية بطريقة مافيهاش تقلبات "Bitcoin"، "ليبرا" هو نتيجة سنة من التفكير لطريقة سهلة للتعاملات المادية لإرسال واستقبال الفلوس من خلال خدمات الفيسبوك.

"فيسبوك" عمل شركة فرعية مستقلة اسمها "كليبرا" هيعمل خدمة تخلي المستخدمين يبعتوا العملة الرقمية "ليبرا" ويصرفوا عن طريق محفظة إلكترونية هتكون متاحة عن طريق تطبيق واتساب وماسنجر وبعد كده هتكون متاحة على "السمارت فونز".

وزي ما قال "مارك زوكربيرج" على الأكونت بتاعه على "فيسبوك"، فإن منظمة "ليبرا" بتمثل خطوة مهمة لخلق بنية تحتية مالية عالمية بسيطة، بتمكن مليار شخص حول العالم إنهم يدفعوا عن طريق عملة رقمية جديدة مدعومة بتقنية "blockchain"، والخطة هتبدأ وهيتم إطلاق العملة الجديدة في 2020.

وقال كمان إن ممكن يبقى للدفع عن طريق التليفون تأثير إيجابي على حياة الناس عشان ماتبقاش مضطر دايما إنك تشيل فلوس أو تدفع رسوم مقابل التحويلات اللي تمت، وتقريبا فيه مليار واحد ماعندهمش حساب بنكي بس معاهم موبايل، وقال إن الهدف منها هو تسهيل إرسال الفلوس على الكل واستلامها زي بالظبط باقي الأبلكيشنز ما بيتم فيها مشاركة الرسايل والصور.

ده غير إنه كان قال في البداية عن شركة "كليبرا" في البداية هتركز خدمات شركة "كليبرا" على إرسال الفلوس وبعد كده هتتيح خدمات أخرى للقطاع التجاري وقطاع الأعمال ودفع الفواتير وغيرها من الخدمات المالية.


 

Comments: