٩ مشاكل هتخليك تفضل “سينجل” ومش هتصاحب: مابتضحكش على النكت

19/06/2019

الناس بتتقابل في الأول عادي ويتشدوا لبعض ويحبوا بعض ويتجوزوا وإنت السنين بتعدي وتروح عليك وقاعد لوحدك إنت والمروحة، بيبقى صعب تنزل "دايت" أو صعب تقابل الشخص اللي تحب تكمل معاه حياتك، للأسف فيه شوية أسباب وعوامل موقفة الموضوع فيك وفي إيدك إنت بتخليك أقل جاذبية، بس ماتقلقش لما تعرف إيه هي المشاكل دي أكيد هتحاول تحلها.

موقع Brightside جمع المشاكل دي بقى وهما:

1- باين عليك إنك مش سعيد:

فيه دراسات اتعملت في جامعة كولومبيا في بريطانيا على ألف مشارك، لقوا إن الموضوع ده بيتوقف على حسب الجنس، يعني الرجالة مثلا بيتشدوا أكتر للستات السعيدة في حين إن الستات بتتشد للرجالة الفخورة بنفسها.

2- بتفتح مناقشات عامة:

يعني مثلا إنك بتتكلم عن الجو حر جدا أو ساقعة جدا، المفروض تبدأ تفتح مناقشات أعمق من كده، وده هيساعدك تبقى مترابط أكتر مع الناس وتندمجوا مع بعض، وده معناه إن فرصتك في الوقوع في الحب هتزيد.

3- إنت شخص مؤمن إن النوم للناس الضعيفة:

عمرك سألت نفسك هي ليه اسمها "Sleeping beauty" أكيد عشان النوم بيحلي الناس، لو مانمتش كويس عينك هتبقى حمرا وحواليها أسود ووشك منفخ وشاحب، وفيه دراسة سويدية قالت إن الناس اللي مابيناموش كويس أقل جاذبية، عشان كده كل واحد محتاج تقريبا من 7 لـ 8 ساعات نوم كل يوم.

4- مابتضحكش على النكت:

الألش والنكت السخيفة عموما بتخلى الناس تضحك من سخفتها، فأكيد عدى عليك موقف كل الناس اللي قاعدين ضحكوا ماعدا إنت، عموما الرجالة والستات الأتنين أكدوا إنهم بيتشدوا أكتر للطرف اللي دمه خفيف، وإن خفة الدم دي مصدر قوي للجاذبية ولحسن حظك ينفع تطورها.

5- بتفتكر إن الألوان مابتلقش عليك:

لو مابتحبش الألوان فأكيد إنت مالبستش اللون الأحمر، و"جيس وات؟" اللون الأحمر هو لون الحب والعاطفة والمغامرة، وفيه دراسات بتقول إن الناس مابتنجذبش للأطراف اللي بتخاف من اللون الأحمر، ده مش معناه إنك تدهن نفسك أحمر بس حاول تدخل اللون في حياتك يعني.

6- إنت دايما قاعد لوحدك:

أكيد كلنا لما بنقضي وقت لوحدنا بيبقى شئ صحي ومريح جدا لكن لو بتدور على إنك تدخل علاقة فدي استراتيجية غلط خالص، عشان فيه دراسات ونظريات أثبتت إن الشخص وهو قاعد في وسط مجموعة من الناس بيبقى شكلة أحلى ما بيكون قاعد لوحده.

7- إنت شخص متهالك:

ظروف الحياة القاسية بتخلي الشخص أقل جاذبية، وده كان واضح عند الستات في المواقف العصبية فبيزيد هرمونات الإجهاد عندهم وبطريقة أو بأخرى بيبان إن الست مش جذابة كفاية.

8- إنت مش شخص متواضع:

التواضع بيخلي الناس تحس بالإنسجام والتعاطف مع الشخص المتواضع عشان كده لقوا إن الأشخاص المتواصعين أكتر جاذبية، بعد كده خد بالك من كلامك اللي بتقوله.

9- بتحب تتقل على الطرف التاني:

وخصوصا في الجزء ده الستات، بيحسوا إنهم كل ما بقوا أتقل كل ما الراجل هيعرف قيمتهم أو هيجري وراهم أكتر لكن ده بيخليهم أقل جاذبية والرجالة تتقفل، لكن أهم حاجة تبقى عارفة توقف التقل ده امتى وتشغله امتى.

Comments: