الـ Summertime sadness حقيقة: اعرف إزاي تتخطاه

19/06/2019

فصل الشتا معروف دايما إنه فصل كئيب بغض النظر اختلافنا أو اتفقنا على إنه أحسن من الصيف، بس قليل لما حد بيجيله اكتئاب في الصيف، لإن معروف إن الصيف عبارة عن بحر أو "بيسين" ورملة وشمس وتان وريحة "الصان بلوك" أو زيت جوز الهند ولعب بقى وهيصه يعني ومسؤوليات أقل، وغالبا ده بيبقى الأسباب دي هي الأسباب اللي ممكن تجيب اكتئاب في الصيف زي ما قالت القديرة "Lana del ray" في رائعتها "Summertime sadness"

فلو مريت بأي وقت حلو في الصيف هتلاقي نفسك بعد ما بترجع للقاهرة الكبرى وضواحيها وعشوائيتها ومسؤوليتها هتتعب ويجيلك اللي قولنا عليه Summertime sadness ، الحقيقي بقى إنها مش مجرد أغنية وإن فيه حاجة اسمها SAD وهي اختصار لـ Seasonal Affective Disorder  وهو إضطراب بيحصل كل سنة في نفس الوقت تقريبا، الناس اللي بتعاني منه بيبقوا بصحة عقلية كويسة طول السنة ولما بيجي وقت معين في السنة بيعانوا من الاكتئاب، ولإن زي ما قولنا في الأول الأغلب بيكون عند الناس في الشتا فنسبة 1:10 بيعانوا من الـ SAD في الصيف.

ممكن يكون فيه أسباب كتير للموضوع ده منهم مثلا إنك في مكان حر جدا والحرارة بتأثر على مزاجك بالسلب، وممكن تبقى من الأشخاص اللي عندهم مسؤوليات أو مش معاهم فلوس يسافروا أو يغيروا جو أو يتبسطوا فبتقلب على السوشيال ميديا وتلاقى نص الفريندز عندك في دهب والساحل والجونة والسخنة وإنت قاعد في المكتب مع زملاء العمل وحيد، وأو ممكن تبقى أقل إنشغال في الصيف وعموما الإنشغال بيسبب السحلة وبتتلهي وفي الصيف ده مابيحصلش، ده غير إن فيه أبحاث أثبتت إن الشهر اللي بنتولد فيه ممكن يأثر على مزاجنا بالسلب (ده لو عيد ميلادك في الصيف يعني).

فكل الأسباب دي بيترتب عليها إن الشخص ممكن يعاني من شوية قلق أو إضطرابات في النوم والأكل ويجيله فقدان شهية أو أرق، عشان كده خلينا نقولك إزاي تتخطى الـ Summertime sadness أو الـ SAD  أو اكتئاب هتعاني منه طول فترة الصيف:

1- أخرج:

ساعات في الوقت اللي بتكون حزين فيه بيبقى صعب تخرج برا السرير، وأه مش الخروج هو اللي هيخلي حزنك يختفي بس إنك تشوف الشمس دي حاجة مفيدة على الأقل بتاخد لجسمك فيتامين D، خصوصا إن فيتامين D بيساعد على تحسين الحالة المزاجية بس طبعا ما تنساش تحط "صان بلوك".

2- اعمل أي أنشطة بدنية:

الصيف هو أحسن وقت في السنة عشان تتمشى مثلا فيه أكيد مش الصبح بس لو اتمشيت بليل من نص ساعة لساعة ده هيساعدك في ترتيب افكارك، وممكن تتعلم سباحة أو تتعلم أي رياضة مأجلها لإن الرياضة عموما بتساعد على تخفيف أعراض الاكتئاب والقلق.

3- اعمل نشاط يخليك مشغول:

أكيد فيه حاجة كنت مأجل تعملها أو تتعلمها دور وافتكر كويس هي إيه وحاول تنفذه في الوقت ده، خد كورسات جديدة في حاجة نفسك تتعلمها أو طور نفسك في شغلك أو اتعلم حاجة جديدة في هواياتك زي المزيكا أو الرقص أو غيرهم، افتكر كويس بس.

4- افهم اكتئابك:

عموما من الطرق الكويسة في حل المشاكل اللي بنمر بيها هي إننا نعرف إيه أسباب المشكلة، وكل ما نركز في الأسباب كل ما هنركز عشان نحلها، اعرف إيه هي أسباب اكتئابك في الوقت ده وأعراضه وعلاجه، وحاول تراقب أفكارك، لكن فعلا لو ماعرفتش تتصرف كويس روح لدكتور أو لحد متخصص يساعدك أحسن.

Comments: